VIGO | 16/04/2018 | Actualizada ás 15:05 por EUROPA PRESS
O presidente da Xunta, Alberto Núñez Feijóo, pediu este luns "dilixencia" ao Concello de Vigo na tramitación da modificación do Plan Parcial de Navia, para que a administración autonómica poida iniciar o ano que vén a construción de case 1.600 vivendas protexidas nese populoso barrio da cidade.
Así o reclamou o titular do Executivo galego nun acto de presentación deste proxecto, no que estivo acompañado pola conselleira de Infraestruturas e Vivenda, Ethel Vázquez; así como por representantes políticos de PP e Marea; representantes veciñais; e empresarios do mundo da construción e a promoción.
Durante a súa intervención, Feijóo lembrou que o proxecto de construír case 1.600 vivendas protexidas, algunhas delas de tipo unifamiliar, irá acompañado pola urbanización de espazos, dotación de aparcadoiro, zonas verdes e usos comerciais, que culminarán a conformación do barrio "máis novo de Galicia". "Esta é a maior aposta en materia de vivenda que fai a Xunta desde que eu son presidente", proclamou Feijóo.
Segundo incidiu, esta actuación (que se dividirá en tres fases) contempla 250.000 metros cadrados de chan residencial, e o investimento directo prevista é de 50 millóns de euros, dos que unha quinta parte dedícanse á adquisición de terreos. Así, engadiu, "é a maior oportunidade que se presenta na cidade para adquirir unha vivenda, e a maior oportunidade de dinamización para os sectores da construción e a promoción".
No entanto, matizou que a Xunta precisa da aprobación definitiva da modificación do Plan Parcial de Navia, que está a tramitar o Concello, para poder iniciar as obras, como estaba previsto, en 2019. Por iso, pediu "dilixencia" á administración local, que xa deu luz verde de forma inicial á devandita modificación en xaneiro pasado.
"COMPROMISO" CON VIGO
O presidente do goberno galego subliñou que a conclusión da urbanización de Navia é un "compromiso" adquirido coa cidade, e proclamou a súa intención de que a Xunta "siga sendo a administración que máis inviste en Vigo".
A ese respecto, incidiu nas medidas urbanísticas e legais adoptadas polo Executivo galego para paliar os efectos da anulación do Plan Xeral de Ordenación Municipal, e sinalou que, grazas a esas medidas, puidéronse acometer actuacións como a ampliación do polígono de Balaídos, as novas dotacións xudiciais, a ampliación do Instituto Feiral ou as obras da estación intermodal.
"Nin as dificultades técnicas, nin urbanísticas, nin económicas ou políticas debería parar ningún proxecto importante en Vigo", aseverou, e incidiu na necesidade de acometer proxectos "con planificación" e de forma "sustentable".
VIVENDA COMO "PRIORIDADE"
Pola súa banda, a conselleira de Infraestruturas e Vivenda, Ethel Vázquez, subliñou, durante a súa intervención, que a política de vivenda é "unha prioridade" do goberno galego, e que a ampliación de Navia e a construción de case 1.600 vivendas protexidas é boa mostra diso.
Segundo afirmou, a Xunta "ten moito traballo xa feito" nesta iniciativa, para a que se presentou a modificación do Plan Parcial, adquiriuse xa a metade do chan e definiuse o proxecto, que se executará en tres polígonos.
Ademais das vivendas, das que 165 serán unifamiliares, habilitaranse máis de 4.600 prazas de aparcadoiro, zonas verdes e comerciais, coa previsión de que unhas 5.000 persoas máis se finquen neste barrio que, desde 2001, multiplicou por cinco a súa poboación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.