SANTIAGO DE COMPOSTELA | 19/04/2018 | Actualizada ás 18:30 por EUROPA PRESS
A secretaria de Xustiza do PSdeG, Paloma Castro, criticou a "absoluta incompetencia" demostrada polo vicepresidente da Xunta, Alfonso Rueda, na xestión do conflito de xustiza despois de que a reunión mantida cos sindicatos o mércores finalizase de novo sen acordo.
Nun comunicado remitido aos medios, a responsable socialista reclama "explicacións inmediatas" das negociacións cos traballadores e acúsao de utilizar a "estratexia da mentira, aplicando a mesma doutrina que a de Cifuentes".
Así mesmo, a dirixente socialista aludiu ao suposto preacordo que o conselleiro "dá por asinado cos sindicatos", que compara co máster "pantasma" da presidenta madrileña. "Se o ten, que o mostre de inmediato e, se non o ten, debe ser cesado polo señor Feijóo por mentir e enganar a todos os galegos", manifestou.
Paloma Castro esixe a presenza do conselleiro en sede parlamentaria para dar conta da súa xestión da crise "que lle desborda claramente" e coa que "está a condenar a miles de galegos a atrasos de anos na aplicación dun dereito básico como é a xustiza".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.