O PP da Coruña prevé case 4.000 persoas na súa 'II Romaría Popular' que celebra este sábado en Santiago

A 'II Romaría Popular' do PP coruñés celbrarase este sábado en Santiago, no recinto feiral de Amio, e que contará coa presenza do líder do PP galego e presidente da Xunta, Alberto Núñez Feijóo.

Por segundo ano consecutivo os populares coruñeses organizan esta romaría. Á reunión ademais de Feijóo, está previsto que acudan o presidente do PP coruñés, Diego Calvo, e os conselleiros da provincia. Fontes do PP provincial avanzaron que para esta cita mobilizáronse autobuses co fin de que poidan acudir simpatizantes e afiliados dos distintos concellos da Coruña. Esta reunión concíbese como unha xornada de lecer.

Para o encontro haberá orquestra, xogos para nenos, inchables e tamén un menú composto por empanada, polbo e 'carne ao caldeiro'. A entrada ten un custo de 20 euros para adultos, dez para os menores de 13 anos e é gratis até os 5.

O PP compostelán celebrou que esta cita teña lugar en Santiago, o encontro do ano pasado foi no Pino. Os populares coruñeses sinalaron que a festa tamén busca potenciar "a importancia e valor das cidades" fronte aos "malos tratos" que, critica, "sofren por parte das mareas".

SEGUNDA EDICIÓN

A deste sábado será a 'II Romaría Popular' que organiza o PP provincial coruñés, xa que o ano pasado o concello do Pino acolleu un evento das mesmas características. Alí os populares aproveitaron para ensinar músculo, reivindicar a unidade e evidenciar que a súa maquinaria, ante as eleccións municipais de 2019, está activa.

Para iso, recuperou un modelo de celebración que identificou a formación na época de Manuel Fraga. Lembrouno na cita o propio Diego Calvo, quen destacou a "importancia" de recuperar "vellas e boas tradicións" como esta romaría que, na súa opinión, demostra que os populares, "ademais de traballar xuntos, saben pasalo ben xuntos".