Galicia avanza no novo plan de turismo rural tras alcanzar o nivel de ocupación previsto para 2020

A Xunta de Galicia concluíu esta semana a primeira fase do traballo de campo que servirá de base para o deseño e elaboración do Plan Estratéxico do Turismo Rural, que pretende fixar as liñas futuras deste mercado.

Segundo indicou a Xunta, Galicia conseguiu en 2017, con tres anos de antelación, a ocupación prevista para 2020 nas estimacións da Estratexia do turismo de Galicia. "Nunca antes este sector superara unha ocupación media do 20%, o que ademais mellora a marca de até nove comunidades", apunta a Administración galega.

Co fin de afondar nesta liña, nos últimos días celebráronse 15 mesas de traballo, nas que estiveron presentes axentes ligados a este sector nos 14 xeodestinos do catro provincias.

Estes encontros tiñan por obxecto testar a situación e fixar os retos cos representantes das administracións e cos principais axentes do sector. Con preto de 200 asistentes ás reunións, constatouse a "crecente demanda neste segmento", que marcou "máximo histórico" en 2017.

Entre o abanico de participantes estiveron, ademais dos propios empresarios, representantes de organismos dinamizadores do turismo, portavoces do sector académico e do sector primario, persoal das denominacións de orixe e consellos reguladores do viño, así como representantes de asociacións de turismo rural, turismo activo, gastronómico, enoturismo, Camiño de Santiago, guías oficiais de turismo, xestores de calidade turística ou axencias.

COLABORACIÓN

Os asistentes subliñaron a necesaria colaboración entre todos os implicados para ofrecer aos viaxeiros unha oferta diferenciada, en liña coa Estratexia do turismo de Galicia 2020.

Así, apostan pola formación, a sensibilización e a profesionalización e por un turismo sustentable vinculado á natureza, gastronomía e cultura, aos oficios artesanais e mesmo á astronomía.

En paralelo a esta primeira fase do traballo de campo, están a realizarse enquisas entre os establecementos de turismo rural, con entrevistas individuais e presenciais para coñecer a súa situación. Recompilarase tamén a opinión de 40 expertos para obter conclusións sobre a realidade social do turismo rural e marcar as liñas futuras para a súa dinamización.