Galicia perde 8.000 habitantes en 2017 a pesar de que Feijóo di que aumentan
O presidente suliñara que os emigrantes baixaron en 1.900 no último ano. Segundo o INE, Galicia é a autonomía que máis habitantes perde, só superada por Extremadura.
Por E.P. | SANTIAGO DE COMPOSTELA | 24/04/2018 | Actualizada ás 14:57
Hai uns días o presidente galego quixo deixar ben claro que Galicia xa non "exporta" emigrantes, senón que atrae inmigrantes, a pesar das saídas masivas de mozos nos últimos anos cara outros países de Europa por mor da crise. "Os emigrantes baixaron en 1.900 persoas no último ano e 10.300 menos que no 2009", dixo en alusión ao último ano do bipartito.
Un anuncio que facía na presentación do seu plan para atraer emigrantes ou fillos de emigrantes con incentivos especiais. "Tivemos a menor taxa de emigración de todo o Estado", indicaba. E insistía en que chegan a Galicia máis xente da que marcha, "desde o 2016 foron 3.025", indicaba. Pero os datos, novamente, volven deixar en mal lugar ao presidente galego.
Galicia segue perdendo poboación e, segundo a estatística do padrón continuo que publicou este martes o Instituto Nacional de Estatística (INE), sitúase entre as comunidades que máis habitantes deixaron de estar inscritos, un total de 7.369 persoas.
PESO DA INMIGRACIÓN, ESCASO
Ademais, o peso da inmigración na Comunidade galega segue sendo escaso, xa que apenas o 3,4% da poboación empadroada é de orixe estranxeira, só superada pola situación de Estremadura, en que este colectivo apenas é o 2,9%.
Os datos da estatística revelan que Galicia contou a 1 de xaneiro de 2018 un total de 2.700.970 habitantes, 7.369 menos que en 2017, é dicir, un 0,3% menos. Deste total, 92.062 eran estranxeiros.
Dos 313 concellos cos que conta a Comunidade, 33 son de menos de mil habitantes e 224 atópanse na franxa de entre os 1.001 e os 10.000 habitantes. Só catro municipios están entre os 50.001 e os 100.000 e unicamente tres superan os 100.000 habitantes: Vigo, A Coruña e Ourense.
