O concello máis importante que goberna o PP na Coruña oponse á mega mina de Touro
Ribeira súmase así a outros seis concellos deste partido que non queren que se reabra a explotación mineira Cobre San Rafael entre Touro e O Pino polas súas posibles consecuencias no sector pesqueiro.
Por Galicia Confidencial | Ribeira | 26/04/2018 | Actualizada ás 10:48
Xa son sete os concellos do PPdeG que non queren que se poña en marcha o mega proxecto mineiro en Touro e O Pino polo temor as posibles consecuencias que un desastre ambiental podería ter en toda a comarca da Arousa e de Santiago. O último en sumarse a esta negativa foi o de Ribeira, o concello máis grande que o PPdeG goberna na provincia da Coruña.
Os populares votaron este mércores, conxuntamente con todos os grupos da oposición, unha proposta conxunta sobre a importancia do sector do mar da Arousa na economía local desta localidade e de toda a ría e dos efectos negativos que o proxecto mineiro presentado por Cobre San Rafael podería ter para a comarca. A proposta, que foi lida polo alcalde, o popular Manuel Ruíz Rivas, foi aprobada por toda a corporación nun pleno no que tamén se atopaba xente do mar.ç
DESESTIMAR O PROXECTO
A moción aprobada insta ás Consellerías do Mar e de Economía, Emprego e Industria a desestimar a "autorización administrativa á actualización do proxecto de explotación" e a emitir unha "declaracion ambiental desfavorable en virtude dos efectos negativos para o medio ambiente". Así mesmo, busca que a Xunta de Galicia promova "unha completa restauración da antiga explotación mineira de Touro", para asegurar que non comprometa a calidade ambiental do río Ulla e da ría de Arousa.
As Plataformas contra a minaría destacan a importancia do sector do mar de Arousa na economía local. "A frota pesqueira de Arousa está composta por 1.709 buques de pesca e 842 auxilares", que representan "respectivamente o 38,6% e o 69,9% do total de Galicia". Cifran a actividade pesqueira do mexillón do ano 2016 en case 80 millóns de euros. A riqueza pesqueira e mariñeira "descansa sobre a riqueza ambiental existente na ría de Arousa e os ríos que desembocan nela, onde a saúde do río Ulla ten un papel fundamental, xa que alimenta de sedimientos e nutrientes á ría" subliña a iniciativa.
IMPORTANTE OPOSICIÓN
Son xa 21 os concellos que xa aprobaron a moción de rexeitamento ao proxecto de reapertura da explotación mineira Cobre San Rafael.
A iniciativa, impulsada polas asociacións veciñais en contra da mina, foi asinada por Arzúa (AA), Santiso (BNG), Lalín (CxG), Oroso (PSdG-PSOE), Teo (SON-ANOVA), Santiago (CA), Ames (PSdG-PSOE, Ames Novo, Contigo Pódese, BNG), Catoira (PSdG-PSOE), Vilagarcía de Arousa (PSdG-PSOE), Rianxo (BNG), A Illa de Arousa (PSdG-PSOE), Cambados (PSdG-PSOE), O Grove (PSdG-PSOE), Ribadumia (IR); ademais de Vila de Cruces (PPdG), Vedra (PPdG), Padrón (PPdG), Pontecesures (PPdG), Vilanova de Arousa (PpdG), Boiro (PpdG) e Ribeira (PPdG).
