Alertan do aumento de estafas por Internet no aluguer de aloxamentos turísticos de Santiago

A xunta local de seguridade de Santiago de Compostela abordou na súa reunión ordinaria deste luns unha "problemática" que aumentou nos últimos tempos: as estafas por Internet relacionadas co aluguer de aloxamentos turísticos da cidade.

Así o indicaron o subdelegado do Goberno na Coruña, Jorge Atán, e o rexedor compostelán, Martiño Noriega, en declaracións aos medios ao termo dun encontro que analizou os datos de criminalidade e seguridade viaria do primeiro trimestre de 2018, período no que se rexistrou un "leve repunte" do seis por cento no "cómputo global" de infraccións penais.

Jorge Atán indicou que este incremento "entra dentro dos parámetros normais" e que é preciso esperar a ver como evoluciona ao longo do ano para emitir "unha valoración máis real". Así, apuntou que, entre xaneiro e marzo, rexistráronse máis roubos con violencia e intimidación, aínda que tamén destacou que se produciu "un incremento moi importante" no número de detencións e casos esclarecidos.

Así mesmo, após remarcar que a criminalidade na capital galega "entra dentro dos parámetros normais", sinalou que Santiago rexistrou menos furtos, tanto graves como leves; aínda que alertou do aumento de denuncias por estafa no aluguer de vivendas turísticas a través de Internet.

Neste sentido, o subdelegado provincial indicou que esta "tipoloxía delituosa" consiste en que os visitantes realizan a reserva do seu aloxamento a través da rede e que, unha vez na cidade, descobren que o apartamento ou piso "non está alugado".

SEGURIDADE NOS CAMPUS

Outro dos asuntos abordados na reunión deste luns foi a seguridade nos campus universitarios, especialmente no relativo á prevención de episodios de violencias machistas e ante as queixas que chegan a través das redes sociais, nas que se crearon os denominados 'mapas do medo' nos que as usuarias poden sinalar os puntos onde sufriron episodios de acoso ou similares.

Neste sentido, o rexedor santiagués, Martiño Noriega, fixo un chamamento a converter as queixas "en denuncias". "As cifras din que as denuncias diminuíron, por tanto hai que levar as queixas en redes sociais a convertelas en denuncias que permitan activar dispositivos", comentou.

Nos mesmos termos expresouse Jorge Atán, que remarcou que, polo momento, non existe "unha tipoloxía específica" que indique "que hai algo especial", polo que instou a que "ante calquera feito delituoso hai que presentar denuncia".

SEGURIDADE VIARIA

Ambos os representantes celebraron a "moi boa colaboración" que mantén a Dirección Xeral de Tráfico e o corpo da Policía Local no relativo a seguridade viaria e que se traduciu nun descenso no número de infraccións e incidentes. Unha das preocupacións que ten sobre a mesa a corporación é diminuír o número de atropelos ante as alarmantes cifras que se rexistraron o pasado ano.

No tres primeiros meses de 2018 os atropelos baixaron "bastante" na capital galega e situáronse nos 15, como indicou o responsable municipal da Policía Local, o concelleiro Xan Duro, que sinalou que esta caída "pode ter que ver" coa implantación de novas sinalizacións e o levantamento dalgúns pasos de peóns, medidas implantadas este ano.