O 'Maio do 68' centra a nova programación bimestral do CGAI

O Centro Galego de Artes da Imaxe (CGAI) pecha esta temporada con diversos ciclos que rememoran o 'Maio do 68' no seu quincuaxésimo aniversario. O programa central desta efeméride consta de nove títulos que repasan os sucesos acontecidos en París, mentres que as retrospectivas do galo Philippe Garrel e do brasileiro João Moreira Salles permiten recuperar varios filmes nos que deixaron plasmada a súa visión das históricas protestas estudantís. Dous documentais esenciais para comprender estes feitos e a pegada que deixaron na esquerda en Francia son 'Morrer aos trinta anos', de Romain Goupil, e 'O fondo do aire é vermello', de Chris Marker.

Outro cineasta que tamén estivo nas protestas foi Jean-Luc Godard, quen un ano antes filmara 'A chinoise', comedia sobre un grupo de estudantes maoístas que dalgunha maneira anticipaba o que estaba por vir. Na rodaxe desta cinta, Godard coñeceu a actriz Anne Wiazemsky, cuxa relación se plasma en 'The Artist', que tamén estará no ciclo do CGAI.

Foi tamén Godard protagonista, xunto con François Truffaut e outros membros da Nouvelle Vague, do boicot que se lle fixo ao festival de Cannes en 1968 en solidariedade coas protestas estudantís de París. O pase no que irromperon para parar a celebración do certame foi o de 'Peppermint Frappé', de Carlos Saura, quen se uniu á folga cinéfila. Aínda que temáticamente non trata das protestas, o filme inclúese tamén no programa polo seu simbolismo. Completan os pases outras ficcións como 'Milou en maio', de Louis Malle; 'Despois de maio', de Olivier Assayas; e 'Soñadores', de Bernardo Bertolucci

O que supuxo o Maio do 68 non se fixo notar só en Francia, cruzou fronteiras a nivel internacional, con movementos similares en moitos países. Esta influencia é a que analiza a través de imaxes de arquivo João Moreira Salles en 'No Intenso Agora'. O festival Documenta Madrid ofrece este ano unha retrospectiva da súa obra, que inclúe tamén películas como o retrato do expresidente Lula, 'Entreatos', que se proxecta no CGAI a mediados de maio.

PELÍCULAS GALEGAS

Non esquece a filmoteca o cinema propio e dos certames galegos. Así, entre o 15 e o 18 de maio acollerá as películas gañadoras dos premios Mestre Mateo, ademais de ofrecer 'Reivindicando a María Victoria Moreno' para conmemorar o Día das Letras Galegas.

'A lingua das bolboretas', de José Luís Cuerda, presentada pola cantante Guadi Galego na sección Pensando en cinema/Pensando en Galicia; o documental 'Vigo 1972', de Roi Cagiao, sobre esa folga xeral na cidade olívica; ou algunhas das últimas pezas de María Ruído, son outros dos filmes galegos que se pasarán no CGAI nas próximas semanas.

A filmoteca será un ano máis unha das sedes do (S8) Mostra de Cinema Periférico, ademais de proxectar algunhas das cintas dos cineastas Peter Emanuel Goldman e Ozualdo Candeias, que tiveron antes o seu paso polo Play-Doc Festival Internacional de Documentais de Tui.

A programación do CGAI complétase co final do ciclo dedicado a Adam Curtis, a proxección de máis títulos de Ingmar Bergman, a quen se lle rende homenaxe ao longo do ano polo centenario do seu nacemento; ou as estreas de autores como Jean-Marie Straub ou Nathaniel Dorsky.