Por Galicia Confidencial | Santiago | 01/05/2018 | Actualizada ás 22:00
A praza 8 de Marzo en Santiago de Compostela foi o punto de inicio da manifestación convocada por "distintas colectivas, organizacións e individualidades feministas" para o primeiro de maio. Esta manifestación contou coa participación de diversos colectivos que se uniron baixo a petición de melloras no eido laboral e social para as mulleres.
A marcha transcorreu polas rúas de Santiago de Compostela desde as sete da tarde e finalizou ás oito e media despois de ler o comunicado que puña punto e final á convocatoria. Nese comunicado declaraban que esta era a continuación da folga do 8 de Marzo "chegamos até aquí despois do camiño feito desde a Folga Feminista, asumindo o noso compromiso como feministas de clase". Apuntan tamén "como feministas de clase na radicalización dos feminismos fronte ao feminismo baleiro de contido, domesticado e fagocitado por diferentes estancias do poder".
O traballo precario que recae sobre unha grande parte das traballadoras foi obxecto de denuncia ao sinalaren "sobre nós tamén recaen as políticas miserables deste sistema corrupto que funciona es e enriquece á nosa custa". Denuncian a merma nos seus dereitos laborais, pero tamén denuncian a represión "á hora de construir as identidaes, corpos, desexos, relacións e vidas que soñamos".
"O sindicalismo de clase é preciso, os sindicatos como ferramentas son precisas pero urxe revisar as lóxicas e dinámicas patriarcais que se reproducen a cotío dentro das organizacións" apuntan. Nese sentido tamén queren denunciar a invisibilización e o non recoñecemento do traballo reprodutivo "e as persoas que se atopan nos lugares feminizados da sociedade e sen o cal todo viría abaixo". "Nós somos a imaxe da precariedade tanto do traballo recoñecido, como no tantas veces negado, o que ten lugar fóra das casas e o que se fai dentro delas".
Non faltaron mencións ás últimas accións xudiciais en canto a violencia machista. "Por iso queremos levantar a voz e poñer os nosos corpos en loita permanente contra as violencias machistas e as estruturas de poder" e remarcan "cada vez que a xustiza falle serán a autodefensa, a acción directa e a loita nas rúas as vías para conquistar condicións e espazos de libertade e seguridade para todas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.