Por Galicia Confidencial | Santiago de Compostela | 03/05/2018 | Actualizada ás 11:34
O WOS Festival celebrará a súa quinta edición en Santiago entre o mércores 12 e o domingo 16 de setembro, cinco días cheos de propostas "en torno ao risco e a exploración, a arte contemporánea e o diálogo entre disciplinas", destacan os organizadores.
Como cada ano, o festival contará co protagonismo dos espazos e a cidade que o acollen, escollendo localizacións "moi especiais" que dotan á experiencia de cada unha das súas propostas dun carácter "único e irrepetible", resalta a organización.
De feito, os escenarios do festival supoñen unha ruta turística e arquitectónica polo corazón da capital galega, desde as liñas contemporáneas do Centro Galego de Arte Contemporánea, a Cidade da Cultura e a sede da Fundación SGAE, ás paredes con varios séculos de antigüidade da Igrexa da Universidade ou a Fundación Eugenio Granell.
WOS Festival x SON Estrella Galicia contará ademais un ano máis con espazos escénicos como o Teatro Principal e a Sala Capitol.
A cita que en anteriores edicións programou a estrea en España da última performance de láser de Robert Henke, creador do software Ableton; a estrea internacional de 'One More Time With Feeling' de Nick Cave; a artistas reverenciados como o ex-Portishead Geoff Barrow e figuras da historia dos sintetizadores como o octoxenario Simeon Coxe de Silver Apples e o exNeu! Michael Rother, lanza as datas que, o próximo setembro, acollerán a súa proposta.
O programa musical, como cada ano, completarase cunha selección de cinema, charlas e mesas redondas, arte audiovisual e performance que posibiliten trazar un diálogo transversal entre disciplinas.
A organización anunciará proximamente os primeiros nomes do programa. Até ese momento, e nunha cantidade limitada ás 100 primeiras unidades, os abonos Weekend e Premium poden ser adquiridos a un prezo especial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.