Por E.P. | SANTIAGO DE COMPOSTELA | 03/05/2018 | Actualizada ás 19:03
A operación 'Vandabal', levada a cabo pola Policía Autónomica, concluíu coa investigación --e detención nalgúns casos-- de 29 persoas acusadas de presuntos delitos de furtivismo e receptación de marisco ilegal. Este dispositivo levouse a cabo no poboado coruñés do Portiño, na costa próxima e na lonxa da Coruña coa colaboración do servizo de Gardacostas da Xunta.
Así, comisáronse 200 quilos de percebe extraídos ilegalmente e un vehículo utilizado para o seu transporte, nunha investigación que comezou en agosto de 2017 e terminou o pasado mes de abril.
O operativo arrincou ao detectar membros do grupo Erpol da Policía Autonómica de Santiago a un grupo de persoas que extraía percebe na illa de Vandabal, "chegando case a esquilmar o produto", segundo apunta a Xunta nun comunicado.
Estas persoas carecían de licenza para a actividade marisqueira, non respectaban as zonas vedadas nin o tamaño do marisco nin as cantidades máximas diarias.
Posteriormente, o produto púñase a disposición dos consumidores a través da venda a particulares, quen mesmo chegaban en ocasións a revender o produto a establecementos hostaleiros da cidade. Tamén se transportaba o marisco até a lonxa, onde se lograba introducir de forma ilícita no circuíto de venda legal. Xulgados da Coruña tramitan dilixencias por estes feitos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.