Por E.P. | Santiago de Compostela | 04/05/2018 | Actualizada ás 14:46
CC.OO. ratificou este venres que dá por finalizada unha etapa no conflito da Xustiza e que acordou coa súa afiliación a reincorporación á actividade, á vez que confirmou que "deixa de formar parte do comité de folga". Así o anunciaron o secretario xeral de CC.OO. Galicia, Ramón Sarmiento, e o secretario xeral da Federación de Servizos á Cidadanía (FSC-CC.OO.), José Manuel Ramos, xunto a Tino Novoa e Raquel Estévez, representantes do sindicato no sector.
A partir de agora, avanzaron que os esforzos de CC.OO. estarán centrados en "recompor a unidade dos traballadores", algo que, baixo o seu punto de vista, "só se conseguirá coa volta ao traballo diario".
Por iso, avogan por reconducir a situación nunha mesa de negociación. Para CC.OO., a folga "conseguiu o seu obxectivo", que era mellorar "de forma substancial" as condicións de traballo do persoal da Xustiza de Galicia.
"Isto traduciuse no conxunto de melloras laborais reflectidas na última proposta que a Xunta trasladou ás organizacións sindicais o pasado 26 se abril", subliña CC.OO., a cuxo xuízo "a presión da folga axudou a que o Goberno galego variase a súa posición inicial".
NON VE NECESARIO MANTER OS PAROS
Por esta razón, non ve necesario manter os paros, senón crear un espazo de encontro para que as melloras propostas poidan iniciar a súa aplicación, desenvolvemento e concreción.
Neste sentido, os portavoces de CC.OO. insistiron en que remitirse a unha mesa de negociación é a "vía adecuada" para "reconducir e pechar o conflito", tomando como referencia "a última proposta da Administración, onde se manteñen pequenas diferenzas pendentes de desenvolvemento".
PACTO POLA XUSTIZA
O secretario xeral de CC.OO. sinalou que, para o sindicato, a problemática deste ámbito vai máis aló das reivindicacións laborais.
Por esta razón, plantexa que, tan axiña como se peche o conflito na vertente laboral, se constitúa unha mesa de concertación co conxunto de axentes sociais para levar a cabo un pacto pola xustiza en Galicia.
Neste foro, abordaranse cuestións de modernización, dotación de máis medios e reivindicación de procedementos, reforzo de xulgados ou formación específica en materias como violencia machista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.