Xunta e sindicatos acordan unha subida lineal de salarios para situar aos docentes galegos como os sextos do Estado

A Consellería de Educación e sindicatos con representación na mesa sectorial do ensino non universitario (CC.OO., UXT, CIG e ANPE) comezaron este mércores as negociacións para revisar os salarios dos docentes galegos e acordaron unha subida lineal que os sitúe na contorna do sexto posto do Estado entre os que máis cobran.

Tanto a Administración autonómica como representantes das catro organizacións sindicais coincidiron en que a subida de salarios terá que ser lineal, é dicir, igual para o catro corpos docentes (educación infantil, primaria, secundaria e catedráticos non universitarios). Na actualidade, segundo os sindicatos, os docentes galegos sitúanse entre os undécimos e os décimo terceiros no ranking nacional, mentres que a Xunta alega que están preto da media.

O director xeral de Centros e Recursos Humanos, José Manuel Pinal, non avanzou ningunha contía até a cal está disposto a chegar o seu departamento, aínda que UXT, CC.OO. e ANPE estimaron unha subida de entre 130 e 135 euros mensuais.

Pola súa banda, o secretario de CIG Ensino, Suso Bermello, asegurou que "está moi ben falar de postos na táboa", pero matizou que "o normal sería abrir unha negociación global", que inclúa a recuperación de condicións laborais e das pagas extra, que cifrou ao redor de 6.300 euros por docente.

(HABERÁ AMPLIACIÓN)