A Fegamp avisa que é "imposible" cumprir o prazo de 31 de maio para limpar leiras

O presidente da federación galega de municipios e provincias (Fegamp), Alfredo García, fala xa dun "plan B" ante a imposibilidade de cumprir o prazo de 31 de maio para que todos os particulares de Galicia limpasen as súas leiras, en cumprimento coa obrigación de manter unhas franxas de seguridade contra os incendios forestais.

De feito García estima que entre o 45 e o 50% das parcelas de "boa parte" da provincia de Ourense seguirá sen ter identificado o seu propietario o próximo 1 de xuño. Ese día expiraría xa o prazo (de 31 de maio) para ter limpas as denominadas franxas de seguridade ante os lumes, que han de ser de 50 metros nas inmediacións de inmobles e vivendas.

A pinza do 45-50% é a que o responsable da Fegamp calcula para leiras sen dono coñecido no concello que preside, O Barco de Valdeorras, pero é unha cifra que cre extrapolable "a boa parte" da provincia de Ourense, lastrada por un abandono "tremendo" e cuxa casuística é diferente, por exemplo, á de Lugo, con menos minifundio.

No seu caso, explicou que o seu consistorio xa asumiu a roza de parcelas de propietario descoñecido nalgunhas parroquias. Con todo, quéixase porque non dá "a basto", xa que para emprender esta vía é preciso abrir un expediente, que é necesario publicar. Un proceso, alega, que bloquearía a actividade de calquera municipio en caso de querer acometer o 100% dos casos. Nin no Barco nin na maior parte de concellos galegos existe persoal suficiente para facer fronte a estes labores, apunta García. "De aí a necesidade de axuda", subliña.

NOVA REUNIÓN A SEMANA QUE VÉN

Por iso, e co ánimo de que esas parcelas abandonadas pasen a mans de veciños que as queiran explotar, urxe o novo convenio anunciado pola Xunta para colaborar de forma financeira cos concellos para que asuman estas tarefas. A semana que vén, "case con toda seguridade", haberá unha nova reunión de carácter técnico para avanzar na redacción do texto e García espera que dese encontro salga un borrador "definitivo".

Ambas as partes levan "menos dun mes niso" e é "un tema complexo", por iso é polo que o responsable da Fegamp pida calma cando se fala de datas, sen ocultar que ao seu xuízo o convenio "debería estar" listo en xuño, para que os traballadores (entende que da empresa pública Seaga) se poñan a actuar ese mesmo mes.

A contía económica que contemplará o acordo sufriu "un baile de cifras", e nestes momentos García inclínase a pensar que para 2018 a dotación será de 6 millóns de euros, tendo en conta que "só van ser seis meses" de traballo. E pon o foco, á marxe da roza, sobre a identificación de parcelas e posteriores sancións, posto que "unha cousa leva á outra". "Eu no momento que identifico a un dono, xa teño a quen dicirlle 'roza': esa é a clave", incide.

O 31 DE MAIO COMO "DÍA MÁXICO"

"Parece que estamos a facer do 31 de maio como un día máxico, ou algo así, no que se van a resolver os problemas", advirte Alfredo García. Neste sentido, interpreta que, chegado ese día, o que ocorrerá será que "o día 1 de xuño haberá xente que rozaría (...)" e outra que non, polo que será necesario "empezar co plan B".

Este 'plan B', expón, consiste en "ver quen limpou, quen non limpou e ao que non limpou, evidentemente, empezar a abrir expedientes sancionadores". Desta maneira, o presidente da Fegamp e alcalde do Barco avoga por "baixar un pouco as expectativas", tendo en conta que considera que é "imposible" que o 31 de maio estean todas as parcelas rozadas.

MÁIS DISPOSICIÓN

Iso si, admite que si observa un adianto con respecto a outros anos, con maior disposición por parte dos particulares para cumprir con esta obrigación legal. Os municipios realizaron avisos, emitido bandos e lembrado aos veciños que corren o risco de ser multados e ata expropiados, sinala. Estas actuacións xeran un "efecto de choiva fina" na xente, "non unha treboada". "Vai aos poucos", profunda García.

Volve ao exemplo do seu concello para ilustrar o avanzado: "Nós empezamos na zona urbana, onde hai moito perigo, e despois de moito traballo, agora, de 100, 100 e pico propietarios rebeldes que había, quedan tres, catro ou media ducia", indica.

Con todo, engade que "é máis difícil" nas franxas do monte, polo que constata que agora, "coa colaboración de todos", hai que dar "o salto ao forestal". "Se todos traballamos en común, por fin vaise a plasmar", valora, despois de celebrar como "moi importante" que a Xunta "por primeira vez" fale de diñeiro no convenio que está por rubricar.

"O QUE PRODUCE NON SE QUEIMA"

Por último, lanza unha mensaxe crucial á que xa fixo referencia na súa intervención na comisión de estudo sobre a problemática dos incendios no Parlamento: "O que produce non se queima", sentenza.

Así, e aínda que precisa que "as cousas necesitan tempo", chama a atención sobre que "tampouco se trata de que as franxas estean limpas pero sen produción". As parcelas, resolve, "teñen que producir algo para que compense telas limpas", e que con iso se evite na medida do posible que os incendios, como cada ano, queimen miles de hectáreas na comunidade.