Rueda consegue impor o ultimato da Xunta a algúns sindicatos da Xustiza

Os sindicatos SPJ-USO, UXT e CC.OO. adheríronse á última oferta presentada pola Administración autonómica para o sector da Xustiza despois do ultimato dado pola Xunta na mesa sectorial do pasado 15 de maio, data na que deu ás organizacións sindicais tres días para aceptar a súa proposta ou se vería "liberada" para pechar o conflito.

Estas organizacións situáronse a prol do acordo na mañá deste venres e despois de que a Xunta rexeitase a solicitude de SPJ-USO para ampliar até o día 23 o prazo que terminaba ás 14,00 horas deste venres co obxectivo de consultar a proposta cos traballadores. Pola súa banda, Alternativas na Xustiza, STAJ, CSIF e CIG continúan sen aceptar a proposta da Administración.

Despois desta decisión, segundo informou Julio Bouza, de SPJ-USO, este sindicato, maioritario no sector, prevé abandonar o comité de folga, órgano do que xa saíran tanto UXT e CC.OO., e dá por finalizado o paro indefinido iniciado o pasado 7 de febreiro. Con todo, as organizacións que non aceptan o acordo sinalan que esta decisión debe alcanzarse nunha reunión do comité de folga.

Con todo, o propio vicepresidente da Xunta, Alfonso Rueda, asegurou o pasado martes que a folga xa non estaba vixente ao ser "interrompida" e avanzou que a Administración procedería a derrogar os servizos mínimos, para os que estaban reservados 775 funcionarios.

OFERTA DA XUNTA

En concreto, a oferta da Administración aceptada este venres por SPJ-USO, UXT e CC.OO. tradúcese nun aumento de 140 euros máis ao mes para os médicos forenses, 135 para os xestores, 127 para o corpo de tramitación e 122 para auxilios, a aplicar en tres anualidades. Os funcionarios percibirán o 50% desta alza neste exercicio unha vez que se valide o acordo, o 30% en 2019, e o outro 20% en 2020.

Tamén contempla un plan de recuperación do traballo paralizado polas xornadas de folga que se elaboraría co TSXG e coa Fiscalía e ao que se poderían adherir todos os traballadores do sector de forma voluntaria, secundasen ou non o paro. Ademais, inclúe unha cláusula de revisión para manter os emolumentos de por enriba da media das outras 12 comunidades máis o 'territorio Ministerio'.

Con todo, esta proposta foi rexeitada en asembleas por case un 53% dos traballadores.

En primeiro lugar, o sindicato SPJ-USO, maioritario no sector da Xustiza, informou da súa decisión pouco antes das 14,00 horas deste venres, momento no que finalizaba o período dado pola Xunta ás organizacións sindicais para situarse sobre a súa proposta e que a administración rexeitou ampliar, como así solicitou SPJ-USO.

Despois de coñecer a negativa da Xunta a aumentar o prazo, SPJ-USO explicou que se suma ao acordo nun "exercicio de responsabilidade" e, "sobre todo de representatividade" por ser "o sindicato maioritario". Ademais, avanzou que explicará a súa posición aos traballadores en asembleas informativas que celebrará a próxima semana no sete cidades.

E é que, segundo argumentan, ante a "imposibilidade de poder consultar aos traballadores" sobre esta proposta pola negativa da Administración a ampliar o prazo de resposta, decidiron unirse ao acordo. "Deixar en mans da Xunta a posibilidade de inaplicación, suspensión ou retirada das condicións conseguidas no referido principio de acordo supón un grave risco de perda de dereitos para os traballadores", advirten.

Pola súa banda, UXT, que tamén dá por desconvocada a folga, explicou que tamén asina o acordo por "responsabilidade". "Non podemos permitir que todo o tempo que participamos nunha reivindicación cunha folga tan descomunal poida quedar en nada", manifestou Manuel Díaz.

Ademais, o representante de UXT mostrouse "convencido" de que a oferta da Xunta dá resposta ás cinco reivindicacións que expuxeron nun principio os sindicatos.

Nesta liña, Tino Novoa, de CC.OO., destacou que este sindicato se suma ao acordo despois de que unha "maioría abafadora" dos seus afiliados considerase que "hai que dar carpetazo á folga", un paro que, na súa opinión, "non ten sentido que continúe". Tamén lembrou que xa cando a Xunta presentou por primeira vez esta última oferta considerárona "satisfactoria".

CUT, STAJ, CSIF E CIG NON ACEPTAN A OFERTA

Enfronte, Alternativas na Xustiza-CUT, STAJ e CIG non responderon ao ultimato da Xunta tendo en conta que consideraban que a mesa sectorial non era o foro adecuado para solucionar o conflito mentres estea o paro indefinido en vigor.

Así mesmo, Pablo Valeiras (CUT), Enrique Araújo (STAJ) e Óscar Freixedo (CIG) coincidiron ao lembrar que os traballadores se manifestaron o pasado 27 de abril en contra desta oferta da Xunta por considerala insuficiente. Ademais, as tres organizacións sindicais lembran que a folga segue convocada e remiten a decisión de porlle fin ao comité.

Por último, CSIF, que crítica que o Goberno "non movese un dedo" para buscar unha solución, advertiu á Xunta que é "un grave erro" pechar "en falso" o conflito e remitiu á Administración unha petición formal de mediación, unha proposta que tamén remitiu ao resto de organizacións sindicais.

"Desde CSIF cremos que a mediación é a solución máis conveniente para pór fin definitivamente ao conflito. Vímolo dicindo desde hai varias semanas, pero agora cremos que é inevitable se non se quere pechar en falso esta folga", sinalou a organización, que lembra que a actual oferta foi rexeitada en votación por case un 53% dos traballadores.

FEIJÓO: "OS TRABALLADORES PIDEN QUE SE ACABE"

Antes de transcender o paso dado polos sindicatos, o presidente galego, Alberto Núñez Feijóo, evitou desvelar que faría a Administración autonómica, á que agora toca mover ficha.

Simplemente, limitouse a xustificar que non se ampliase o prazo como pedía SPJ-USO. "Non procede", constatou e esgrimiu que os traballadores "piden que o conflito se acabe" e só estaban a esperar "o posicionamento sindical".

MÁIS DE CEN DÍAS DE FOLGA

Deste xeito, tres dos sete sindicatos que integraron o comité de folga —que chegou a estar formado por SPJ-USO, Alternativas na Xutiza-CUT, UXT, CSIF, STAJ, CIG e CC.OO.— dan por desconvocada unha folga que os propios sindicatos cualifican de "histórica" pola súa duración após superar os cen días.

Precedida por xornadas de paro previas e reunións para negociar que concluíron sen éxito, arrincou o pasado 7 de febreiro e logrou paralizar o funcionamento de xulgados e rexistros civís. O seu balance son uns 17.000 xuízos e milleiros de trámites xurídicos suspendidos.

Nestes máis de cen días, o conflito pasou por moitas fases e varias reunións entre as partes, que partiron de posturas moi distanciadas. Os encontros acabaron sucesivamente en fracaso, pero os sete sindicatos do sector aguantaron unidos até o 26 de abril, cando romperon despois de que catro deles avalasen un preacordo coa Xunta (SPJ-USO, UXT, CSIF e CC.OO.) que os outros tres (AXG-CUT, CIT e STAJ) rexeitaron.

As acusacións de negociación bilateral e de "venderse" á Administración precederon a votación dos traballadores e case un 53% acabaron dicindo non á proposta da Xunta na votación do 27.

Desde esa xornada, o seguimento da folga foi a menos e o paro quedou interrompido polo propio comité (no que se reagruparon activamente SPJ-USO, AXG-CUT, CIG e STAJ) a pasada semana, aínda que non desconvocado formalmente.