SANTIAGO DE COMPOSTELA | 24/05/2018 | Actualizada ás 18:30 por EUROPA PRESS
O presidente da Xunta, Alberto Núñez Feijóo, considera "razoable" que a Fiscalía abrise dilixencias despois dos atascos rexistrados na Ponte de Rande, na AP-9, ao entender que, cando se paga por usar unha autoestrada, "o lóxico é que estea expedita" e, se non é así, que haxa "unha repercusión na tarifa".
Manifestouno despois de ser preguntado pola decisión da Fiscalía Provincial de Pontevedra de abrir dilixencias preprocesales para investigar o "deficiente funcionamento sostido" rexistrado "nos últimos meses" no tramo da AP-9 na Ponte de Rande, derivado das obras de ampliación de capacidade que realiza a concesionaria Audasa.
Feijóo lembrou que hai usuarios que denunciaron que fixeron "colas durante varias horas" en "varios días" e esgrimiu que agora é preciso determinar se quen se viron afectados deben ser compensados polo ocorrido.
PEAXE EN REDONDELA
Por outra banda, sobre a liberación da peaxe en Redondela, subliñou que o compromiso do Ministerio de Fomento "non ten marcha atrás" e entende que "de aquí ao verán debería estar solucionado".
En todo caso, puntualizou que a resolución dependerá de se hai ou non "conflito" entre a proposta da concesionaria e a formulación que faga o Ministerio. "Se é de mutuo acordo será máis fácil e, se non, levará máis tempo", concluíu o presidente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.