Por Galicia Confidencial | Santiago | 25/05/2018 | Actualizada ás 13:53
A Sección Oficial da MICE proxectará os filmes que competirán polo premio á Mellor Película Etnográfica. Mentres, os traballos galegos a concurso son tres, Os fillos da vide, Nocturno: fantasmas de mar en puerto e Palmira. Estas tres producións aspiran ao premio á Mellor Película Galega. Os asistentes ás proxeccións outorgarán mediante as súas votacións o Premio do Público.
Filmes como Ohne Diese Welt de Nora Fingscheidt ou La nuit éclaire la nuit de Lo Thivolle chegan á 13ª MICE co aval de ter pasado por festivais do prestixio da Berlinale ou o Visions du Réel. Outros como Deixa Na Régua de Emílio Domingos pasaron polo ForumDoc.dh do Brasil, un dos festivais de cinema etnográfico máis importantes de Latinoamérica.
A mesa de debate Ollares intencionados; a proxección especial de Contrafaces en colaboración coa Semana do Libro de Compostela; o obradoiro familiar A miña primeira película ou a exposición Camiños da Imaxe. Arquivo de Joaquín García Portela "Costiña" completan as actividades da Mostra Internacional de Cinema Etnográfico do Museo do Pobo neste 2018.
O acto inaugural da 13ª MICE do luns 4 de xuño acollerá a primeira sesión de curtametraxes da sección Etnografía, muller e cinema formada por Tshweesh de Feyrouz Serhal, The boy from H2 de Helen Yanovsky e Why is Difficult to make Films in Kurdistan, Ebrû Avci. A presentación estará ao cargo da súa coordinadora Anxela Caramés e de Gonzalo E. Veloso, programador do FIC de Verín. Etnografía, muller e cinema completase cun segundo bloque de curtas de Xisela Franco (Cruz Piñón), Olaia Sendón, Fisterra, carne de Safari e Estíbaliz Sádaba Las Filanderas e a proxección de Trinta Lumes de Diana Toucedo, que se poderá ver por primeira vez na capital galega.
O Cineclube de Compostela afianza a súa colaboración coa MICE coa secciónTrazas. Os filmes que integran este segmento teñen como fío condutor a relación entre a ficción e o cinema etnográfico. Forman a escolma On the Bowery de Lionel Rogosin (1956), o clásico portugués Trás-os-Montes de Margarida Cordeiro e António Reis (1976), Turumba de Kidlat Tahimik (1981), Nice Coloured Girls de Tracey Moffat (1987) e Daughter Rite de Michelle Citron (1978).
A sección Espiello, que leva o nome en referencia ao Festival Internacional de Documental Etnográfico de Sobrarbe, incorpora dúas das obras galardoadas neste festival: Marquis de Wavrin, du manoir à la jungle, de Grace Winter e Luc Plantier (Bélxica, 2017) e China's 3Dreams de Nick Torrens (Australia, 2014). Obras como Grub and Run de Roser Corella e Chamán de David Gómez Rollán tamén foron premiadas en Sobrarbe máis participan na MICE na Sección Oficial a concurso.
As proxeccións serán de balde previa recollida de entrada. As sesións no Museo do Pobo son de acceso libre ata cubrir aforo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.