Por Galicia Confidencial | Madrid | 26/05/2018 | Actualizada ás 13:48
O voceiro de En Marea no Congreso, Miguel Anxo Fernán Vello, amosou este sábado o apoio desta formación "sen condicións" á moción de censura do PSOE contra o Goberno de Rajoy "para retirar do Goberno a un mandatario corrupto e a un presidente do Executivo que non ten credibilidade e que mentiu en sede xudicial".
Fernán Vello insistiu en que os partidos teñen a "obriga democrática de rematar co Goberno dun partido cuestionado no plano xudicial, social e vinculado coa corrupción". "O Partido Popular, como se desmostrou, financiouse de xeito ilegal case durante 20 anos", indicou. Esta iniciativa tamén podería ser apoiada por case todos os partidos nacionalistas e independentistas.
"É unha práctica criminal. Facemos un exercicio de altura política, estamos diante da necesidade de contribuir á rexeneración democrática e institucional", insistiu o deputado que tamén lembrou como o pasado ano, o Grupo Confederal presentou tamén unha moción de censura porque consideraba que "había que sanear a democracia". Unha iniciativa que, daquela, non foi apoiada polo PSOE.
Fernán Vello tamén matizou que En Marea estará "atenta" ao programa do PSOE pero insistiu en que aposta "por unha política de apoio ás maioría sociais". "Nós estamos pola derogación da reforma laboral, da Lei mordaza, por abrir o debate sobre o modelo de Estado e apostar pola plurinacionalidade. Estamos coa cidadanía e loitaremos por sacar do Goberno a un partido corrupto", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.