Por Galicia Confidencial | A Coruña | 29/05/2018 | Actualizada ás 14:56
As fendas abertas en En Marea ameazan con converter en papel mollado este proxecto político que actualmente é a segunda forza política de Galicia. Un proxecto que pode quedar en nada ante as ameazas doutros actores que participan nel de artellar espazos alternativos. Podemos, primeiro, e Anova, despois, deron xa un serio aviso de que En Marea, tal e como está agora, non pode continuar.
Non fondo, o problema non é tanto de proxecto político, que tamén, senón de personalismos e enemistades manifestas que o caso Paula Quinteiro non fixo máis que agrandar. De feito, o incidente da deputada do grupo anticapitalista de Podemos coa Policía Local de Santiago supuxo un antes e un despois na formación rupturista. Desde entón, por un lado está o sector “federalista” e, polo outro, o sector "máis nacionalista".
“Con Quinteiro acelerouse todo”, suliñan fontes consultadas. “Antes había tensións, diferencias, pero o de Paula supuxo un antes e un despois”, indican. Desde entón, a relación de gran parte do grupo parlamentario con Villares é tensa ou case inexistente. Con el só están David Rodríguez, ex rexedor de Manzaneda, e do sector crítico de Anova, e Paula Vázquez Verao, de Cerna. Os dous do sector máis nacionalista de En Marea. Tamén algún outro deputado mantén boas relacións con el, pero pouco máis.
AVISOS DE PODEMOS E ANOVA
En fronte, Podemos --coas súas distintas correntes--, Esquerda Unida e o grupo oficialista de Anova. "O que pasou nos últimos meses conseguiu algo ata agora impensable; que todos os grupos enfrontados de Podemos se uniran e fixeran piña", destaca outro deputado consultado que asegura que a insistencia dos afíns de Villares en apartar a Quinteiro volveu tecer novas alianzas e procuroulle certa estabilidade a líder de Podemos, Carme Santos.
De feito, Santos foi a primeira en insinuar que había que "reestruturar" en Marea. Non é a primeira vez que no seu círculo aseguran que foi un erro ir baixo esta marca e non a de Podemos nas eleccións e, por iso, insiste en ir ás locais coa súa marca. Algo que, curiosamente, non acontecerá en Compostela, A Coruña e Ferrol, onde gobernan mareas locais afíns aos críticos a Villares.
Despois de Podemos foi Anova a que suxeriu que En Marea, tal e como está agora, non é válida como proxecto de futuro. Un golpe en toda regra á viabilidade futura da formación rupturista e que podería provocar unha nova división deste espazo semellante á que xa aconteceu no BNG de Amio. Por un lado irían Podemos, Esquerda Unida e Anova --quizais baixo a fórmula Podemos-EU-Anova-- nunha fronte moito máis "republicana" ou "españolista", --segundo denominacións dalgúns críticos-- e polo outro, En Marea, "máis nacionalista".
PROBLEMAS CASE PERSOAIS
Este mesmo mércores o alcalde de Santiago e membro de Anova, Martiño Noriega, censuraba que "xente que non ten representatividade exerce" na dirección de En Marea, aínda que aclara que esa crítica "non vai por Luís (Villares)", o portavoz da formación. Unha clara alusión a Cerna, o espazo excindido precisamente de Anova.
Precisamente, os nomes de "palleiro" --Luis Eyré-- e "López Rico" --dous dos dirixentes desta corrente nacionalista-- están en boca de moitos dos dirixentes de Anova, Podemos e EU á hora de falar da crise de En Marea. "Son eles os que intoxican, os que utilizan a xornalistas concretos de La Coz e os que lle meten páxaros na cabeza a Luís", apunta unha fonte consultada.
Da outra banda, acusan aos de Anova e, nomeadamente á FPG, de estar "vendidos" ao "españolismo de Iglesias, de Carmencita --Carmen Santos-- e da Yoli --Yolanda Iglesias--. "Aquí a cuestión é que houbo quen está facendo todo o contrario do que dixo que se ía facer; nin En marea é un proxecto autónomo de Podemos ou Izquierda Unido, nin ten grupo propio como ten Compromís, nin se cumpre o que di o código ético", indican.
Con todo, Martiño Noriega mandaba este martes un aviso. "O espazo está formulado conceptualmente, o que hai é que polo en marcha". "Levo tempo dicindo que no espazo a nivel de composición e exercicio do mesmo, ultimamente o que se bota en falta é que as partes queiran exercer nel e acrediten nel porque é un espazo transformador", sostiña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.