Por E.P. | SANTIAGO DE COMPOSTELA | 02/06/2018 | Actualizada ás 17:30
O programa de vacinación infantil alcanzou unha cobertura superior ao 99% "na maioría dos casos" de primovacunación (inmunización primaria), segundo destacou a Consellería de Sanidade. Deste xeito, sitúase por enriba da media estatal, que é do 97%.
O conselleiro, Jesús Vázquez Almuiña, destacou este sábado que a aplicación sistemática das vacinas en forma de calendarios vacinais, tanto infantil como de adulto, é unha das actuacións sanitarias "máis consolidadas" na sociedade.
"Podemos dicir con orgullo que temos neste momento un magnífico calendario de vacinacións, e moi ben aceptado, como reflicten os datos de coberturas", resaltou durante a inauguración da XXI Xornada central de formación en vacinas.
En concreto, chamou a atención sobre a situación do sarampelo en Galicia. "Na nosa comunidade mantense controlado grazas ás elevadas coberturas de vacinación, pero debemos centrar os nosos esforzos en manter e mesmo mellorar esas coberturas", sinalou.
Tamén subliñou a inclusión este ano da tetravírica no calendario infantil, unha medida "para contribuír ao obxectivo de diminuír o número de picadas aos nenos", xa que se refire ao sarampelo, a rubéola, parotiditis e varicela.
Pola súa banda, o calendario de adulto, como principal novidade, introduciu unha nova vacina sistemática —a antineumocócica conxugada trecevalente—, recomendada a toda a cidadanía galega ao cumprir os 65 anos cunha dose única. Neste primeiro ano de actuación, segundo apunta Sanidade, a cobertura alcanzada foi do 26,5%.
Con respecto á vacinación da gripe, destaca o aumento en dous puntos na vacinación nos maiores de 65 e "a mellora" das coberturas entre os profesionais sanitarios, cun aumento dun 5%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.