Por Uxía Iglesias | Santiago de Compostela | 05/06/2018 | Actualizada ás 22:00
Alá polo 1917, mentres os nosos escritores galeguistas se organizaban nas Irmandades da Fala, Ramón María Aller, un lalinense abraiado pola astronomía, fundou o primeiro Observatorio Astronómico de Galicia. Agora, van 75 anos do momento en que o observatorio se trasladou a Santiago de Compostela e pasou a depender da Universidade. José Ángel Docobo é o seu director, e con motivo desta celebración, o Ateneo de Santiago convidouno para que nos mergullase nos segredos do Universo.
CAL É A NOSA POSICIÓN E RELEVANCIA NO UNIVERSO?
A conferencia, que xirou arredor de estrelas e sistemas planetarios, desenvolveuse nun pequeno espazo do edificio de Afundación, na Rúa do Vilar. Un lugar diminuto e insignificante se pensamos en chave de Universo. O profesor Docobo fíxonos conscientes do ínfimo espazo que ocupamos cando explicou a nosa posición dentro do Universo.
Nós atopámonos nun planeta da Vía Láctea, unha galaxia máis dentro dun sistema enorme de galaxias que á súa vez, forma parte do que se coñece como grupo local, que volve constituír supercúmulos máis grandes. “O universo está totalmente xerarquizado”, di Docobo. E nós somos tan minúsculos coma unha mota de pó ao pé dun xigante.
As distancias tampouco axudan. Os astrónomos mesmo falan de anos luz. “Cando nós miramos para o ceo todo o que vemos pertence á Vía Láctea, pero tamén podemos observar unha nebulosidade diferente: é a Galaxia Andrómeca”. Moito máis grande ca a nosa, atópase a 2600000 anos luz de onde nós nos situamos. Así pois, nunca poderemos ver a Andrómeda tal como é no noso presente, observarémola sempre como xa foi hai 2.600.000 anos. Para facérmonos unha idea das lonxitudes, Docobo puxo un exemplo: “Se a Terra está a un metro do Sol, a seguinte estrela máis achegada a nós atópase a 3500 km”.
Pero isto non remata aquí. Só na nosa Galaxia hai 200 mil millóns de estrelas. Estímase que haxa dous billóns de galaxias. E calcúlase que hai oitocentos trillóns de planetas. Ante cifras tan inabarcables, a pregunta que lle xorde a Docobo xórdenos a todos: “Será a Terra o único planeta que alberga vida?”. “De seguro que non estamos sos pero si estamos completamente illados”, axiña se respondeu o astrónomo.
O contacto con outros planetas faise moi complexo polas distancias enormes que existen entre nós e eles. Con todo, “neste preciso momento pode haber outras civilizacións que si estean en contacto entre eles”, imaxina Docobo. Todo é posible cando falamos do Universo.
A SINGULARIDADE DE CADA ESTRELA: LUCES E CORES DIFERENTES
Sempre gustamos de desfrutar da beleza dun ceo estrelado e sempre nos vincula con moi diversas sensacións. Mais o certo é que os nosos ollos non alcanzan a ver moitos detalles que se nos acaban pasando por alto. Quen había pensar, a simple vista, que as estrelas tiñan luces e cores diferentes?
Docobo explicou que Hiparco de Nicea, un astrónomo, xeógrafo e matemático grego, foi o primeiro en catalogar as estrelas polo seu brillo aparente. Así pois, decidiu adscribir cada punto de luz a unha magnitude diferente, sendo as máis luminosas de magnitude un e as máis apagadas de magnitude seis, o límite da visión humana. Co paso do tempo, esta forma de medir aplicouse tamén aos planetas.
Seguindo esta regra e aumentando as súas categorías, o Sol situaríase nunha magnitude de -26’7 e a lúa chea en -12’6. Son os astros máis luminosos dende a Terra. Con todo, Docobo puntualizou que o brillo das estrelas depende da súa enerxía e da distancia que se atopen de nós. Polo tanto, para coñecer o brillo real das estrelas deberiamos velas todas á mesma distancia.
As súas cores, ademais, varían en función da temperatura da fotosfera -a superficie da estrela-. Desta maneira, aínda que dende o prado máis afastado da contaminación lumínica das cidades todas as estrelas sexan amarelas, hainas mesmo azuis. Canto máis calor garde a súa superficie, máis colorada será esa estrela. E pola contra, canto máis fría sexa, máis tenderá a cores azulados.
Sobre estrelas, planetas e galaxias lévanse descuberto moitos misterios, e máis que quedan... Cando Aller Ulloa mirou cara ao ceo dende Lalín atopou novidades non antes sabidas por ningún outro astrónomo.
RAMÓN MARÍA ALLER ULLOA: O LALINENSE QUE MIRABA CARA AO CEO
Dende lonxe houbo un gran interese pola astronomía. Hiparco, Copérnico, Aristóteles... son nomes que nos soan, persoeiros que foron cambiando a concepción do universo coas súas achegas. Aller Ulloa pode engadirse á lista. Dende o seu modesto Observatorio de Lalín implicouse en diversas investigacións e conseguiu crear escola en todo o país.
Mesmo introduciu novos conceptos no eido da astronomía. En referencia a eses astros que se observan próximos entre si dende a Terra, el acuñounos como estrelas dobres. En realidade, son estrelas moi distantes a unha da outra e separadas pola onda gravitatoria, pero que conseguen enganar a vista e semellar próximas.
Todos os seus avances ían vendo luz nunha revista astronómica alemá, a máis antiga rexistrada. Pouco a pouco, o observatorio de Lalín ía collendo sona e mesmo moitos persoeiros chegaron a visitalo: Vicente Risco, Ramón Otero Pedrayo... Pronto se converteu nunha institución recoñecida. E Docobo tivo palabras de agradecemento ao labor de Aller Ulloa: “foi todo un pioneiro, autor de libros moi importantes como Algoritmia, que precisamente este ano fai o centenario”.
Hoxe en día, o Observatorio de Lalín é museo, e as actividades desenvólvense no Observatorio de Santiago de Compostela, que leva por nome Ramón María Aller Ulloa na súa honra. Con Docobo como director, están involucrados en numeras investigacións sobre o estudo dos astros.
Se hoxe en día podemos saber moito do que agocha o ceo é grazas á actividade de persoeiros como Aller Ulloa e estudosos como José Ángel Docobo. Pero sabemos tanto como seguramente descoñecemos... A astronomía aínda ten moitos misterios por diante para resolver.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.