Por E.P. | VIGO | 06/06/2018 | Actualizada ás 12:42
A conselleira do Mar, Rosa Quintana, eludiu pronunciarse sobre a posibilidade de que Alberto Núñez Feijóo suceda a Mariano Rajoy á fronte do PP, e sinalou que "neste momento o que toca" é "agradecer" o traballo de Rajoy, á vez que afirmou que "o futuro de Feijóo é o presente que temos en Galicia". Así se pronunciou despois de participar na inauguración dun congreso sobre cumprimento normativo no sector pesqueiro, que se celebra en Vigo.
"Neste momento, o que toca é agradecerlle ao presidente Rajoy o traballo que fixo, a dignidade que mantivo", proclamou e, citando a Feijóo, repetiu que España tivo "dous grandes presidentes", Adolfo Suárez e Mariano Rajoy.
Na súa opinión, a Suárez os españois deben agradecerlle "a magnífica transición que realizou" e, con respecto a Rajoy, lembrou que "non hai tanto tempo que España estaba tamén necesitando unha transición". Así, recalcou que pasou de "ser un país ao bordo da quebra, con desprestixio internacional, a piques de ser intervido", a ser "un país moito máis solvente, que volve recuperar a credibilidade a nivel internacional" grazas a Rajoy, ao que hai que recoñecerlle "o seu traballo e o seu esforzo".
Con respecto ao futuro de Feijóo, e se sería un bo sucesor do ex-presidente e que pasaría en Galicia se o líder dos populares galegos marcha a Madrid, Rosa Quintana limitouse a aseverar: "O futuro de Feijóo é o presente que temos hoxe aquí, en Galicia".
CARTEIRA DE PESCA
Por outra banda, e a preguntas dos medios, Rosa Quintana tamén se referiu ao próximo ou próxima ministra de Pesca. Aínda que rexeitou pronunciarse sobre nomes concretos, expresou o seu desexo de que "o presidente Pedro Sánchez acerte" no nomeamento.
A ese respecto, lembrou que o novo responsable de Pesca deberá enfrontarse a "retos moi importantes", como a negociación do 'brexit' ou a negociación das posibilidades de pesca para 2019 no consello de ministros da UE previsto para decembro.
"O único que podo desexar é que a persona que se poña á fronte desta responsabilidade coñeza o sector, que lle queira ao sector e que defenda ao sector diante doutras institucións. E, sobre todo, desexarlle moita sorte desde o minuto un en que tome de posesión", aseverou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.