As prioridades dos orzamentos 2019 serán investimento en I+D+i, o Xacobeo e a creación de emprego

A Xunta comeza a elaborar os orzamentos de Galicia para o ano 2019 e aposta polo investimento en I+D+i, o gasto para a programación do Ano Xacobeo 2021 e a creación de máis postos de traballo co fin de "mellorar as condicións de benestar" actuais.

O obxectivo principal do conxunto dos orzamentos é "manter o crecemento da economía galega", segundo indica a Xunta nunha nota de prensa. En 2017 o Produto Interior Bruto de Galicia creceu por riba do 3% e o Centro de Predición Económica (Ceprede) estima que en 2018 continúe esta tendencia á alza e o PIB da Comunidade alcance un crecemento do 3,2%.

O programa orzamentario que está a elaborar a Xunta segue a folla de ruta do plan estratéxico de Galicia 2015-2020. A administración informa que ten como prioridade crear un modelo económico de crecemento baseado en "o coñecemento, a especialización, a innovación e a internacionalización" da economía. Para elaborar as novas partidas, o Goberno autonómico tomará como referencia de cara ao futuro texto os "indicadores de produtividade de anos anteriores".

PREVISIÓNS DE GASTO E INGRESOS

Estes orzamentos estruturaranse ao redor de catro comisións que avaliarán os obxectivos dos diferentes programas de gasto e que deben coincidir coas metas do plan estratéxico até 2020. Pola súa banda, unha comisión de ingresos propios e finalistas determinará, analizará e agregará os datos necesarios para elaborar previsións de taxas e prezos. A distribución final dos orzamentos por programas, capítulos e proxectos de gasto levaraa a cabo a comisión funcional do gasto.