Por Galicia Confidencial | Santiago de Compostela | 11/06/2018 | Actualizada ás 14:37
Con motivo do Día Internacional do Medio Ambiente, a Rede Galega de Tecnoloxías Ambientais (REGATA) e a agrupación estratéxica CRETUS da USC, coordinados polo Grupo de Biotecnoloxía Ambiental (Biogroup), organizaron o segundo simposio sobre investigación en tecnoloxías ambientais, no que participaron medio cento de investigadores e investigadoras das tres universidades galegas.
A xornada, celebrada no edificio CERSIA-Empresa en Santiago, combinou 28 relatorios orais e nove tipo póster presentados por persoas de 12 grupos de investigación diferentes, o que lle conferiu un carácter multidisciplinar á xornada. Como novidade este ano, e para motivar unha participación activa, os asistentes puideron valorar in situ as exposicións en termos de calidade e interese científico a través dunha enquisa en liña.
Ao remate, o comité científico do simposio formado polos docentes Marta Lores Aguín, grupo LIDSA da USC; Mª Carmen Veiga Barbazán, grupo BIOENGIN da UDC; Jesús R. Aboal Viñas, grupo ECOTOX da USC, e a organizadora da xornada Iria Lema, do Biogroup da USC, entregaron os premios ás mellores comunicacións orais e póster.
Na categoría das comunicacións orais, todas as persoas galardoadas pertencen ao Biogroup da USC. O primeiro premio foi para Guilherme Rodrigues por ‘Correlación entre microorganismos durante unha sobrecarga orgánica en reactores anaeróbicos’, o segundo para Riccardo Bevilacqua por ‘Understanding mixed-culture fermentation of proteins for added-value chemical production’ e o terceiro para Alba Roibás polo traballo ‘Produción de biopolímeros mediante a valorización de graxas e aceites residuais xerados na industria conserveira’.
O premio á mellor comunicación póster recaeu en Mª Eugenia Guerra, do LIDSA da USC, por ‘Estudos preliminares de degradación fotoquímica de Patent Blue V en produtos de hixiene oral’ e o segundo en Nieves Carballo, do Biogroup, por ‘Efecto de nanopartículas metálicas sobre procesos de dixestión anaerobia’. O terceiro premio foi para Sofía Debén, de Ecotox da USC, por ‘Calidade das augas ¿Por que conformarte cun instante cando podes sabelo todo?’.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.