As vítimas do accidente do Alvia abrirán o 4 de xullo a comisión de investigación

O órgano que investigará o sinistro escoitará o testemuño de 12 comparecentes o próximo mes no Congreso dos Deputados.

Por E.P. | Santiago | 12/06/2018 | Actualizada ás 20:51

Comparte esta noticia

A comisión do Congreso que investigará o accidente ferroviario en Angrois (Santiago de Compostela) en 2013 abrirá finalmente o próximo 4 de xullo a rolda de comparecencias e recibirá en primeiro lugar a representantes das vítimas do sinistro, no que faleceron 80 persoas e outras 144 resultaron feridas.

Protesta das vítimas de Angrois
Protesta das vítimas de Angrois | Fonte: Europa Press

Así o acordaron este martes a Mesa e Portavoces da citada comisión parlamentaria, que puxeron data aos 12 comparecentes, en total serán 49, que está previsto que desfilen pola Cámara Baixa o próximo xullo, mes no que se celebrarán tres sesións, en cada unha das cales se escoitará o testemuño de catro comparecentes, segundo confirmaron a Europa Press fontes parlamentarias.

Para iso, antes a comisión que preside o independentista catalán Feliu Joan Guillaumes deberá pedir á Mesa do Congreso permiso para poder traballar tamén en xullo, inhábil a efectos parlamentarios.

En concreto, o próximo 4 de xullo, a comisión comezará coa intervención do portavoz da Plataforma Vítimas Alvia 04155, Jesús Domínguez, ferido o sinistro, e a outro vogal da mesma plataforma, en sesión matutina. Xa pola tarde, será a quenda da Asociación de Prexudicados polo Accidente Ferroviario do Alvia de Santiago de Compostela (APAFAS), e de Elena Moreno González, outra vítima do accidente.

O 11 DE XULLO, O MAQUINISTA E INTERVENTOR

A seguinte sesión espérase para o 11 de xullo, cando a comisión escoitará os testemuños de Manuel Salvador Román, familiar doutra vítima do sinistro, e de Carmen Jiménez Berrocal, directora da Oficina de Atención a Vítimas. A sesión vespertina está reservada para o maquinista e interventor do tren sinistrado, Francisco José Garzón Amo e Antonio Martín Marugán, respectivamente.

A última reunión do mes de xullo terá lugar o día 17, cando pasarán pola comisión o xefe de maquinistas, José Ramón Iglesias Mazaira; Nicolás Izquierdo, xefe de Tráfico de Renfe; José Enrique Villarino Valdivielso, técnico de Renfe; e Beatriz Sierra Barba, da Axencia Estatal de Seguridade Ferroviaria.

OS POLÍTICOS, AO FINAL

A formulación inicial é que os responsables políticos reclamados polos grupos parlamentarios pechen os traballos da comisión, a modo de colofón. Entre eles están a presidenta do Congreso, Ana Pastor, ministra de Fomento desde decembro de 2011 a decembro de 2015; o exministro de Xustiza Rafael Catalá, entón secretario de Estado de Planificación e Infraestruturas; e José Blanco, ministro socialista de Fomento (2009-2011).

Outros dos comparecentes que desfilarán polo Congreso nos próximos meses son os expresidentes de ADIF Antonio González Marín e Gonzalo Ferré Moltó; José Teófilo Serrano, presidente de RENFE Operadora de 2009 a 2013; e o director de Seguridade Ferroviaria da Axencia Ferroviaria Europea, Christopher Carr.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta