Sánchez Melgar apela á formación especializada dos fiscais para ser "máis eficaces"

O fiscal xeral do Estado en funcións, Julián Sánchez Melgar, cualificou de "esencial" a formación especializada dos fiscais para ser "máis eficaces", durante a súa intervención no Pazo de Mariñán en Bergondo (A Coruña) na inauguración dun curso da Escola de Verán do Ministerio Fiscal.

Nel, e en alusión á temática do curso, 'A problemática xurídica das persoas maiores', defendeu tamén a necesidade de potenciar o papel do fiscal como "unha auténtica maxistratura de amparo", en alusión ás persoas "desvalidas". "Non só de persecución de delitos", incidiu.

O acto contou tamén coa presenza, entre outros, do vicepresidente da Xunta e conselleiro de Presidencia, Administracións Públicas e Xustiza, Alfonso Rueda, quen aludiu á "colaboración imprescindible" no ámbito vinculado cos servizos sociais.

Mentres, o presidente da Deputación da Coruña, Valentín González Formoso, incidiu na importancia de abordar a situación na que quedan persoas que viven soas ou aquelas que faleceron "sen que ningún servizo social soubese deles".