Por Galicia Confidencial | Santiago de Compostela | 13/06/2018 | Actualizada ás 13:30
A Associação de Docentes de Português na Galiza (DPG) comeza unha nova campaña para promover a presenza da lingua portuguesa nos centros de ensino secundario de Galicia. Pretenden así sensibilizar os estudantes da primaria, a familias e a sociedade en xeral para a importancia de se inscribir nos centros de secundaria que ofrezan a materia de lingua portuguesa.
Ademais, con esta campaña queren axudar a sensibilizar os centros de secundaria que aínda non ofrecen portugués para que avalíen as potencialidades e as posibilidades de ter a lingua portuguesa dentro da oferta académica do centro.
Ao abrigo da Lei para o aproveitamento da lingua portuguesa e vínculos coa lusofonia, aprobada por unanimidade polo Parlamento Galego, os centros e o profesorado interesados na progresiva incorporación da Lingua Portuguesa no ensino secundario teñen unha "gran oportunidade e o grande desafío de alargar a presenza do portugués en Galicia", asegura a asociación.
Co fin de animar a estudar a lingua, a DPG ten creado un folleto informativo onde engade que o portugués é a quinta lingua máis falada no mundo. Ademais, recolle que galego e portugués naceron xuntos e no mesmo lugar e que o pobo galego é o máis capacitado para alcanzar un maior progreso na aprendizaxe da lingua en menos tempo. "A falicidade coa que a persoa que sabe galego aprende portugués é un estímulo para o estudo", din.
Finalmente, informan de que se pode escoller a lingua portuguesa nas probas ABAU como lingua estranxeira un e dous.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.