Marcha en Teo contra a planta de reciclaxe en Casalonga
A Plataforma Veciñal Casalonga Limpa de Residuos convoca unha marcha para este domingo 17 en dirección ao monte Casalonga, onde a empresa Toysal pretende construir unha planta de reciclaxe industrial.
Por Galicia Confidencial | Teo | 14/06/2018 | Actualizada ás 11:13
A saída está programada para as 11 da mañá desde sete puntos diferentes de partida, aproximadamente a 2 quilómetros cada un do lugar onde a empresa Toysal querería emprazar as instalacións de reciclaxe.
Os lugares desde onde se partirá serán a canteira abandonada en Teo, serán a estación de tren de Osebe, a escola de Casalonga, a capela de Ameneiro, a Carballeira do San Martiño en Francos, o parque de Texexe, a área recreativa de Mouromorto e a Carballeira de Luou. Todos estes puntos de partida confluirán na Carballeira de Cornide.
Alí instalarase un palco ademais do stand da plataforma. Haberá actuacións musicais a cargo da veciñanza e rematarase o encontro coa lectura dun comunicado convidando á xente a finalizar a andaina subindo ao monte da Casalonga, a poucos metros da Carballeira de Cornide. Durante o acto en Cornide, haberá recollida de sinaturas e venda de camisolas. A plataforma está satisfeita coa iniciativa realizada para a recollida de sinaturas e venda de camisetas.
A Plataforma Veciñal Casalonga Limpa de Residuos naceu o día 4 de xuño para facer fronte á iniciativa da empresa Toysal de construir unhas instalacións para o tratamento de residuos industriais. Esta empresa é tamén a que leva o vertedoiro das Somozas, que segundo fontes próximas ao sector da reciclaxe, din que está a piques de sobordar os seus límites.
Para máis información http://casalongalimpa.gal
