Feijóo asegura que se ve en Galicia até 2020 "como mínimo"

A decisión do presidente galego, Alberto Núñez Feijóo, de non pugnar por suceder a Mariano Rajoy á fronte do PP estatal marcou o pleno desta semana na Cámara autonómica e, con especial intensidade, a sesión de control deste martes na que o tamén líder do PPdeG desvelou que el vese en Galicia até 2020 "como mínimo".

Despois de que o seu anuncio de que quedará na Xunta frease calquera hipotético movemento no seu partido encamiñado á sucesión no PPdeG, que agora queda posposta e mentres a dirección aposta por centrarse en traballar para as eleccións municipais, dirixentes populares incidiron xa en que Feijóo podería volver presentarse ás próximas autonómicas.

De feito, o seu número dous no PPdeG, Miguel Tellado, afirmou na pasada xornada que el mesmo llo pediría. Este martes, Feijóo deixou a porta aberta ao afirmar que prevé seguir en Galicia "como mínimo" até 2020, aínda que o fixo de forma indirecta e a través dunha chiscadela ao portavoz parlamentario do PSdeG, Xoaquín Fernández Leiceaga.

Foi durante un debate sobre a política forestal, cando Feijóo chamou a Leiceaga a un consenso. "Agora que vostede e eu imos estar en Galicia até 2020 como mínimo", propúxolle o xefe do Executivo, antes de agregar: "Eu creo que vostede merece estar máis tempo porque é un activo para o PSdeG".

Previamente, Leiceaga recoñecera a Feijóo que se "equivocou" na pasada sesión de control ao dar por feito a súa marcha a Madrid e o presidente galego bromeou con que el tamén retiraba o de que non sabía se o actual portavoz seguiría no seu posto 15 días despois.

Feijóo, así mesmo, contrapuxo a "estabilidade" que dá a maioría absoluta do PP coa "incerteza" do PSdeG; ao que Leiceaga respondeulle que quizais, dada a media ducia de candidatos que pugnarán por suceder a Rajoy, "non sexa o mellor momento" para reivindicar a estabilidade no partido.

"AXENDA GALEGA"

En todo caso, Leiceaga, do mesmo xeito que o resto de portavoces da oposición, instaron ao presidente galego a "centrarse" en traballar por Galicia unha vez que decidiu quedar na comunidade.

"Demostre que queda para exercer como presidente da Xunta e impulsemos unha axenda galega que foi incapaz de defender ante Rajoy", instou a portavoz do BNG, Ana Pontón, quen incluíu nesa axenda demandas como o traspaso da AP-9, a incorporación ao patrimonio público do Pazo de Meirás, unha tarifa eléctrica galega, o AVE ou os 180 millóns "que o Estado debe a Galicia en dependencia".

Iso si, advertiu que espera que non cambie "os seus anos de servilismo" por pasar agora a "usar Galicia como arma do PP para facer oposición en Madrid", nun "pimpampúm" que os populares, augurou, protagonizarán porque están "enrabietados" despois de perder o poder. "Iso sería caer na máis vella das políticas: dicir unha cousa cando gobernan os seus e outra, cando o fai outra cor política", advertiu.

"PRESIDENTE CONSTITUCIONAL"

Se Pontón ironizou con que anunciou que non se ía "en perfecto español" e insistiu en que agora que "deixa de ser refén" do seu partido debería impulsar "unha axenda galega", Feijóo replicoulle que a axenda do BNG está marcada por "tentar gañar o protagonismo que lle negaron as urnas", mentres a súa aposta é por "resolver os problemas dos galegos".

"Eu non teño máis axenda que Galicia onte, hoxe e mañá. E non o cambio por ningunha outra. Temos axenda galega e esixiremos que se cumpra", sentenciou, na liña da mensaxe que trasladou a Leiceaga cando ratificou que se reunirá co presidente do Goberno, Pedro Sánchez, en xullo.

En fronte, afeou ao BNG adoptar unha postura "diferente" cando gobernaba co PSdeG en Galicia e era "socio" dos socialistas no congreso. "Entón votaron en contra do traspaso da AP-9 e ter un 8% do total do orzamento estatal era idílico. Entón tamén cambiaban a cota pola cooperación intelixente", esa é a súa biografía".

Feijóo aproveitou para advertir que non admitirá "reformas constitucionais exprés" para "apontoar aos socios precarios" do PSOE en Madrid. "Vou ser, son e serei o único presidente constitucional dunha nacionalidade histórica en España. O meu futuro decidírono os galegos e as miñas enerxías onde sempre estiveron é en Galicia", recalcou.

Sobre o seu uso do castelán na intervención na que anunciou que quedaba en Galicia, replicou que el é "español" e, como tal, ten "o deber e a obrigación" de coñecer esta lingua. "A nosa forma de ser españois e galegos é falar en España castelán e en Galicia, galego", esgrimiu, antes de instar a Pontón a "non confundir Galicia co BNG".

"PREFIRO SER PRESIDENTE DA XUNTA"

"Nunca enganei aos galegos e non o vou facer; os galegos son listos. Hai vida intelixente, votan libremente e cada catro anos entenden que o BNG é o peor para o país", sentenciou e, ante o malestar xerado nas filas nacionalistas, esgrimiu que lembrar os resultados electorais non supón, ao seu modo de ver, "unha falta de respecto".

"Critícanme por ser coherente, primeiro porque me ía e despois porque quedo. Prefiro ser presidente da Xunta e renunciar a ser candidato á Presidencia do Goberno que renunciar á palabra dada aos galegos", garantiu o presidente, quen no seu posterior debate con Villares tamén foi obxecto das pullas do portavoz de En Marea, Luís Villares, en relación á súa decisión de non optar a liderar o PP.

"MELLOR A RÍA DE AROUSA QUE O MANZANARES"

Así, en ton xocoso, Villares preguntoulle "como lle foi por Madrid". "Breve pero intenso, non?", interpelouno, antes de afirmar que En Marea celebra "que quedase". "En Madrid fai unha calor asfixiante... Onde haxa un bo paseo pola Ría de Arousa que se quite o Manzanares, pero, iso si, botando crema para evitar a melanoma", ironizou.

Villares tamén bromeou posteriormente co retiro "dourado" de Feijóo, en evidente alusión ás fotografías dos anos 90 nas que o actual líder do PPdeG saía acompañado do histórico contrabandista Marcial Dorado.

Feijóo limitouse a lembrar ao dirixente rupturista que estaba no Parlamento, que hai que "respectar" a institución, e cominoulle a non confundir o escenario "cunha asemblea" de En Marea. "Vostede ve a 70 persoas e xa se cre que está nunha porque lle vai menos xente", esgrimiu o líder do PPdeG, quen advertiu a Villares que "de tanto mentir xa non lle cren nin os seus".