Por E.P. | SANTIAGO DE COMPOSTELA | 21/06/2018 | Actualizada ás 14:49
O presidente da Xunta, Alberto Núñez Feijóo, remarcou que, "sen ningunha dúbida", o líder do PP que salga do próximo congreso extraordinario de xullo "será candidato á Moncloa en 2020" e contará con "o seu apoio" e a "mesma lealdade" que profesou a Mariano Rajoy até o seu adeus político.
Ao termo da reunión do seu Goberno, a preguntas dos medios, Feijóo esforzouse en aclarar as manifestacións que realizara previamente en varias entrevistas radiofónicas e explicou que "o que quixo dicir" é que el estaría a disposición de liderar o PP se a oportunidade fose en 2020, "pero non foi así".
Neste sentido, quixo disipar dúbidas en relación aos seus obxectivos futuros garantindo a súa "absoluta lealdade" a quen salga elixido dun congreso para o que, admitiu, sería partidario dunha candidatura de integración que limite os efectos dunha posible división do partido, pero sempre despois de que se pronuncien os militantes nas asembleas do 5 de xullo.
En canto ao seu apoio, após lembrar que só ten "un voto", remitiu á necesidade de esperar tamén a que "falen os militantes" o 5 de xullo. Será despois cando, revelou, analizará a situación cos compromisarios do PP galego que votarán na segunda volta. "Se hai acordo ou unha postura maioritaria haberá un pronunciamiento do PPdeG e, se non, non", recalcou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.