Caballero ofrece a Javier Losada "apoio" para traballar a favor do Goberno de Sánchez, nun "café entre amigos"

O secretario xeral do PSdeG, Gonzalo Caballero, mantivo na Coruña un encontro co novo delegado do Goberno en Galicia, Javier Losada, "compañeiro e amigo desde hai anos", no que ambos mostraron todo o respaldo "ao rumbo" que está a dar Pedro Sánchez a España.

Un día despois da toma de posesión de Losada, Gonzalo Caballero reiteroulle as súas felicitacións e trasladoulle "todo o apoio do PSdeG para traballar conxuntamente" a favor do Goberno de Pedro Sánchez, que está "a recuperar a ilusión" e ofrecendo "un proxecto de progreso para toda a cidadanía".

"Neste momento de enorme satisfacción da cidadanía que quería un cambio de ciclo en España, todos os socialistas estamos nunha liña de traballo conxunto", subliñou o líder do PSdeG.

"Todos estamos esperanzados, ilusionados, motivados e dispostos a traballar con toda a nosa forza para dar resposta á cidadanía, que demandaba un cambio e políticas de progreso", engadiu.

Ao fío desta afirmación, o secretario xeral puxo en valor un Goberno de "exemplaridade e dignidade" fronte "aos problemas de corrupción do PP", coa "prioridade no social e nas necesidades da cidadanía fronte aos recortes da dereita", e "con vontade de diálogo con todos os axentes políticos dentro do marco constitucional".

"CAFÉ ENTRE AMIGOS"

Nesta liña de "traballo conxunto" enmarcou Caballero este encontro co novo delegado do Goberno, con quen --destacou-- "sempre mantivo unha relación continua e fluída e unha total sintonía, como ocorre con Pedro Sánchez".

Losada ratificou que o deste sábado foi "un café entre amigos" que serviu para comentar "os eixos fundamentais" que se porán en marcha desde o Goberno de España e os asuntos específicos de Galicia.