Bandas galegas celebran que O Son do Camiño apoie a escena local

Bandas galegas que tocan en O Son do Camiño, que se celebra do xoves 28 ao sábado 30 en Santiago, celebran que un festival "tan grande", no que actúan artistas como Franz Ferdinand, The Killers, Jamiroquai ou Lenny Kravitz, apoie tamén á escena local, con presenza de grupos do país.

A cantante e guitarrista de Bala, Ánxela Baltar, aplaude tamén que os organizadores deste evento, que serve para a promoción do próximo Xacobeo 2021, apostasen pola presenza de grupos con mulleres.

Pola súa banda, o líder de Novedades Carminha, Carlos Pereiro, alias 'Carlangas', avanza que estrearán unha canción no Monte do Gozo. "Sempre é unha ocasión especial tocar en casa", destaca, tamén en declaracións a Europa Press.

A banda de noise rock Bala (mesturan outros estilos como o stoner, o punk e o metal), composta por Ánxela Baltar e Violeta Mosquera (á batería), subirase ao escenario a tarde do primeiro día do festival, o xoves 28.

Acaban de chegar de Estados Unidos, onde tocaron no parque nacional de Joshua Tree e en Los Ángeles (tres días) e pronto lles espera a cita musical ao aire libre de maior magnitude de Latinoamérica: o Rock al Parque de Bogotá, en Colombia. Pero "tocar en casa sempre é un subidón", resalta Ánxela.

Acostumada a xirar por locais de Santiago, A Coruña e Pontevedra, o 50% de Bala valora a de O Son do Camiño como "unha grande ocasión", posto que estarán rodeadas de "moitas bandas amigas".

Pola súa banda, Carlangas, que xunto ao resto de integrantes de Novedades vive en Madrid desde hai moito (uns 12 anos), valora tamén a "oportunidade boísima", por tocar "diante dos teus amigos e a túa familia... e 20.000 persoas máis". Será a tarde do sábado.

A súa primeira vez no Monte do Gozo como artista foi no Rock in Way (2011) e ten recordos "boísimos", posto que Novedades Carminha só contaba cun disco e foi cando coñeceron o seu actual manager e a xente do seu selo.

Como público, neste auditorio, un dos máis grandes de Galicia ao aire libre, lembra desde os Rolling Stones ata os grupos de renome que acudiron polo Xacobeo de 2004: Bob Dylan, Echo & The Bunnymen, Iggy & The Stooges... "Son concertos que che marcan e crean afección", apunta.

TRABALLARÁN EN NOVOS DISCOS DESPOIS DO VERÁN

Tanto Bala como Novedades Carminha teñen a idea de meterse no local con novos temas despois do verán, xa que nos próximos meses se acumulan as datas por multitude de festivais.

Ánxela resalta que Violeta e ela están "a empezar, con cousiñas", e por agora o que ensaiaron é "estilo 'Lume' total". 'Lume' (de 2017) foi o seu segundo disco, tras 'Human Flesh' (2015), "que foi máis un experimento". Así, a cantante e guitarrista de Bala augura que o novo álbum (que, se dá tempo, estará listo para 2019) irá "pola liña máis crúa, máis macarra e con moitos berros".

Con "moito avanzado", os membros de Novedades Carminha desvelarán unha canción en O Son do Camiño. A súa intención foi descansar un pouco este verán para poder centrarse no novo elepé, pero ao final o seu nome, un habitual dos festivais, figura en ata unha quincena de carteis.

Ningún dos dous cantantes se decide por unha opción, entre tocar en salas ou en grandes eventos. "Non hai que escoller, as salas son o formato clásico do rock e os festivais, as verbenas do século XXI", chancea o líder de Novedades.

ALMORZO CON BLOODY MARY

Sobre o "bo momento" que vive o 'stoner', con festivais dedicados en exclusiva como o que se desenvolve na localidade portuguesa de Moledo ou o escenario 'Desert' do Resurrection Fest, Ánxela Baltar opina que "quizais aquí (por Europa) agora está máis de moda ca nunca".

Elas acaban de chegar de California, o berce deste xénero musical, e traen anécdotas para aburrir. "Cando imos por aí (o ano pasado estiveron en Xapón e en Australia) non paran de pasar cousas. É unha anécdota constante", chama a atención.

Pero, se tivese que quedar con algunha, apunta á "honra" de pasar uns días con Brant Bjork (de Kyuss), que foi quen lles recomendou tras velas actuar en Australia en 2017. "Fomos grazas a el, e foi unha pasada poder estar na súa casa, sendo alguén a quen admiramos tanto, almorzando 'bloody marys' ás 10 da mañá", rememora.

QUEIMANDO ETAPAS

Mentres, Carlos Pereiro explica que a Novedades lles custou "moitísimo esforzo" poder vivir da música, e ten críticas para un sistema no que "debería haber máis facilidades".

Acerca de se para chegar a este punto tiveron que sacrificar algo do seu estilo musical (máis punk ao principio), responde que "cero". "A nivel artístico sempre fomos libres. Facemos o que nos dá a gana. Nacemos cando tiñamos 19 anos e eramos unha banda de punk rock ao uso. Agora temos 29-30 e é normal que non queiramos seguir facendo o mesmo. Imos queimando etapas", expón.

Deste xeito, reivindica facer o que lles "pide o corazón" como única maneira de ser "coherente cun mesmo". "Se sempre tiras do mesmo fío, chegará un momento no que se che esgote. Nós agora temos unha paleta de cores da que elixir", resolve.

OUTROS GRUPOS GALEGOS EN O SON

Outros grupos con acento galego que estarán en O Son do Camiño son Triángulo de Amor Bizarro, Agoraphobia (o xoves), True Mountains, Malandrómeda, Furious Monkey House (o venres) e Terbutalina, Eladio e os Seres Queridos e León Benavente (o sábado).

Entre os grandes nomes, tamén sobresae o de C. Tangana, estrela do 'trap' nacional; os suecos Mando Diao e o grupo de post rock instrumental formado en Madrid Toundra, que acaba de sacar o seu quinto álbum, 'Vortex'.