Por Galicia Confidencial | Santiago de Compostela a | 25/06/2018 | Actualizada ás 12:58
O programa “O lixo desde o teu concello” da Mancomunidade de concellos Serra do Barbanza oferta actividades de Educación Ambiental para acadar unha conciencia sobre a correcta separación dos residuos dun xeito lúdico e agradable. Así pois, o obxectivo do programa é a redución, a reutilización e a reciclaxe - as coñecidas tres Rs -.
Entidades culturais, comisións de festas, centros de ensino dos concellos de Brión, Lousame, Noia, Porto do Son, Muros, Ames, Pontecesures, Carnota e Rois poden solicitar estas actividades co propósito da mellora das prácticas de reciclaxe e do medio ambiente. Unha ecoauditoria de residuos, un obradoiro de reciclaxe de papel, outro de creación de xoguetes con resíduos, unhas charlas sobre a substitución dos tóxicos no fogar e sobre a análise de bolsas do lixo, un obradoiro de compostaxe... son algunhas das actividades que teñen previstas nestes próximos meses.
Outra actividade moi interesante para esta época de festividades é a ambientalización de festas e/ou eventos. As celebracións non están reñidas co coidado do medio ambiente, e ademais, son un bo lugar para visibilizar a correcta separación dos residuos. Nestas actividades poden participar persoas adultas e menores, e dende a asociación asesorarán e acompañarán. Neste caso, as accións a realizar son a elaboración de cartaces coa sinalización dos contedores e a redución de plásticos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.