O Concello de Sada urxe ao Estado que presente a demanda civil contra os Franco para recuperar o Pazo de Meirás

O alcalde de Sada, Benito Portela, pide ao Goberno central que "de forma inmediata" inicie as accións legais pertinentes contra os herdeiros da familia Franco para lograr a incorporación do Pazo de Meirás ao patrimonio público.

O Concello de Sada presentou un voto particular ao informe da comisión de expertos designada pola Consellería de Cultura, e que presidiu o catedrático de Historia Xosé Manoel Núñez Seixas. Concretamente, o municipio onde se sitúan as tamén coñecidas como Torres de Meirás discrepa de que se abra a porta a unha liquidación do proceso que supoña unha indemnización dos gastos de mantemento que se poidan acreditar desde o 21 de novembro 1975 até a actualidade.

En todo caso, o informe propón unha acción reivindicatoria que implica que a Administración Xeral do Estado debe presentar unha demanda ante o Xulgado de primeira instancia de Betanzos, partido xudicial que lle corresponde a Sada.

Respecto diso, o rexedor deste municipio considerou que "si que se debe de iniciar de forma inmediata" esa demanda por parte do Goberno do Estado, ao que el mesmo se dirixiu tamén en días pasados para pedirlle que en se considerase Meirás na "solución conxunta" para a aplicación da Lei de Memoria histórica.

"Esperamos que pase dunha vez ao público e pór fin á vergoña", sinalou, pola súa banda, o concelleiro Francisco Montouto, membro da comisión.

BIC 2011, POSTA EN VENDA E PXOM

As Torres de Meirás, inmoble ao que despois se lle engadiron outras leiras expropiadas polas que algunhas se documentou que nunca se pagaron, nunca foi de titularidade pública. O edificio pasou da familia Pardo Bazán a Francisco Franco como particular, despois de que unha comisión —da que formaban parte sublevados do réxime— solicitase o diñeiro.

En febreiro deste ano, os herdeiros de Franco puxeron á venda nunha web de inmobles de luxo o pazo, aínda que ao ser un ben declarado de interese cultural (BIC), en 201, a Xunta sempre terá prioridade de tenteo no caso de que aparecese un comprador.

Polo momento, non se coñece ningunha oferta para a adquisición do inmoble. Dáse a circunstancia, de que o Concello de Sada modificou o Plan Xeral de Ordenación Municipal (PXOM) de maneira que non está permitido ningún outro uso que non sexa o residencial particular, polo que o pazo non se pode converter nun establecemento hostaleiro.