Os 13 acusados de traer menores de Romanía para obrigalas a mendigar pactan dous anos de cárcere
As mozas pasaban desde a mañá a noite pedindo polas rúas de Ferrol.
Por E.P. | A CORUÑA | 26/06/2018 | Actualizada ás 12:04
A Audiencia Provincial da Coruña condenou a dous anos de prisión ás 13 persoas acusadas de traer a menores de Romanía para obrigalas a pedir polas rúas de Ferrol, após recoñecer os feitos e chegar a un acordo coa Fiscalía.
A Sección Segunda da Audiencia Provincial da Coruña tiña previsto celebrar este martes e mércores o xuízo contra este grupo de acusados, para quen inicialmente o Ministerio Público solicitaba sete anos de prisión para cada un deles por trata e uso de menores para mendicidade.
Con todo, após o acordo alcanzado coa Fiscalía, a condena foi rebaixada a dous anos de cárcere, ao aplicárselles as atenuantes de reparación do dano, por indemnizar con 1.000 euros a cada vítima, así como dilacións indebidas no proceso xudicial.
No escrito de acusación apúntase como entre os anos 2012 e 2013 os acusados viaxaron a Romanía --e nun dos casos a Zamora-- para concertar matrimonios, baixo pago de determinadas cantidades coas familias das vítimas, co obxectivo de levalas a España para obrigalas a mendigar.
O fiscal constata que as mozas saían "diariamente desde a mañá á noite a pedir diñeiro polas rúas", baixo a vixilancia dos acusados, aos cales lles entregan a ganancia obtida.
