Por E.P. | Santiago de Compostela | 27/06/2018 | Actualizada ás 13:05
Galicia, cun 5,5% do total de viaxes realizadas, sitúase como a sétima comunidade máis visitada por residentes españois durante o primeiro trimestre do ano. En total, segundo os datos da Enquisa de Turismo de Residentes que elabora o Instituto Nacional de Estatística (INE), a comunidade galega contabilizou neste período máis de 2,2 millóns de viaxes.
Por diante de Galicia como destino favorito para os españois, están Andalucía (co 16,6% do total de viaxes computadas), Cataluña (12,5%), Castela e León (10%), Valencia (8,7%), Madrid (8,5%) e Castela-A Mancha (5,9%). Se se relacionan as viaxes internas dos residentes coa poboación de destino, o fenómeno viaxeiro ten máis intensidade en Castela e León (con 1.635 viaxes por cada 1.000 habitantes), Aragón (1.508) e Castela-A Mancha (1.172). Galicia rexistra 814 viaxes por cada 1.000 habitantes.
En canto aos turistas galegos, no primeiro trimestre do ano realizaron tamén máis de 2,2 millóns de viaxes, o 5,4% do total. A duración media das pernoctacións foi de 2,5 noites. Os galegos fixeron 806 viaxes por cada 1.000 habitantes, o que os sitúa por baixo da media estatal (883).
GASTO NA COMUNIDADE
Os viaxeiros que tiveron como destino Galicia gastaron 49 euros de media ao día, o que supón o noveno posto na táboa de comunidades, lonxe dos 77 euros de media de Canarias e Madrid, ou os 74 de Baleares. Os valores máis baixos danse en Castela-A Mancha (38 euros), e en Castela e León e Navarra (41 euros en ambas).
Finalmente, os galegos gastaron 57 euros de media ao día nas súas viaxes, situándose Galicia como a sexta comunidade cuxos residentes realizan un gasto máis baixo. No polo oposto, o gasto medio máis alto realízano os veciños de País Vasco (78 euros), Cataluña (75) e Baleares (72). En fronte, os máis baixos danse en Estremadura (48 euros), Castela-A Mancha (51) e Cantabria (52).
CONXUNTO DE ESPAÑA
No conxunto de España, os residentes no país realizaron 40,7 millóns de viaxes no primeiro trimestre de 2018, o que supón un crecemento do 3,7%. Estas viaxes supuxeron 125,8 millóns de pernoctacións e un gasto total de 7.999 millóns de euros (+11,7%), polo que o gasto medio por persona durante a viaxe foi de 196 euros e o gasto medio diario de 64 euros. O principal motivo da viaxe foi o lecer, recreo e vacacións, cun 42,7%, seguido de visitas a familiares e amigos (40,5%), motivos profesionais ou de negocio (10,3%) e outros motivos (6%).
O 9% VIAXOU AO ESTRANXEIRO
Doutra banda, o 91% das viaxes tivo como destino principal España, e o 9% o estranxeiro. As viaxes con destino interno acumularon o 79,7% das pernoctacións e o 65,7% do gasto total, cun gasto medio de 52 euros por día. Pola contra, as viaxes no estranxeiro supuxeron o 20,3% das pernoctacións e o 34,3% do gasto total, cun gasto medio de 107 euros. No 66% das viaxes, os residentes optaron por aloxamento non de mercado. Estes acumularon o 65,6% das pernoctacións e tiveron un gasto medio diario de 34 euros, mentres que o gasto medio dos turistas que se aloxaron nun hotel foi de 150 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.