Denunciados por esinar fóra da escola

"Fomos denunciados anonimamente no teléfono do menor, apareceunos a Policía na casa, o trato foi moi correcto, pero ... para unha familia normal abrir a porta da súa casa e atopar unha placa é moi impactante". Quen así fala é Mónica, nai dunhas das poucas familias galegas que aposta por ensinar aos seus fillos á marxe da escola tradicional, fano eles mesmos nas casas. Fragueiro ten tres fillos, dúas nenas en edade de ser escolarizadas.

A Xunta acaba de aprobar unha nova norma, Lei de Apoio á Familia e a Convivencia de Galicia,  na que se poñen máis trabas ao que coñecido no mundo anglosaxón como "Homeschooling". Como apuntaba Sechu Sende nunha reportaxe para GC sobre o ensino na casa "esta lei nom fai distinçom algumha entre a desescolarizaçom por negligência e a das crianças em ensino doméstico ou em sistemas alternativos que garantem o direito à educaçom".

Fragueiro explica que o ensino doméstico consiste en "asumir integramente a educación dos nosos fillos, que non quere dicir que non botes man de escolas a distancia, como é o noso caso".

Esta nai argumenta que a educación na casa "forma parte de moitas constitucións e forma parte do ordenamento lexislativo de todos os países do noso entorno". Polo contrario, aquí é unha iniciativa que moitos poderes públicos non ven con bos ollos. Isto levou aos pais a organizarse en colectivos a nivel galego e español.

O caso desta familia aínda non está nos xulgados, pero en Galicia hai outras familias que xa tiveron que pasar pola Xustiza. As familias apuntan que até agora a maioría das sentenzas foron favorábeis aos pais, tras os xuíces comprobar que non hai abandono dos cativos.