A Xunta resalta a "evolución positiva" da flota do Cantábrico grazas ao plan de xestión

A directora xeral de Pesca, Acuicultura e Innovación Tecnolóxica, Mercedes Rodríguez, resaltou a "evolución positiva" da frota galega que faena no caladoiro Cantábrico desde a entrada en vigor do Plan de Xestión no ano 2010. Así o trasladou durante a súa comparecencia na Comisión 8ª do Parlamento galego, celebrada este xoves e na que Rodríguez debullou os últimos datos de capturas, vendas e facturación da frota galega do Cantábrico, referidos ao pasado ano.

Deste xeito, a responsable de Pesca destacou que a frota galega vendeu "un 28 por cento" e facturou "un seis por cento" máis en 2017 en comparación con 2010, ano de entrada en funcionamento do Plan de Xestión do Caladoiro Cantábrico. En cifras, en 2017 a frota galega descargou en lonxa "máis de 142.00 toneladas" por valor de "máis de 216 millóns de euros". Así, en base a estes datos, remarcou que "a non xestión" dos caladoiros "non é a solución" porque "o actual modelo do caladoiro permitiu unha mellora nos rendementos económicos da frota e que se acabase coa 'pesca olímpica'".

"Se todos saísen a pescar ao mesmo tempo aparecerá unha gran cantidade de peixe, produto perecedoiro, o que fará que o seu prezo caia ou mesmo que haxa que retiralo da venda", argumentou, para logo incidir en que o plan de xestión permite "planificar" para orientar as capturas aos momentos nos que o peixe alcanza un prezo máis alto.

DATOS POR SECTOR

Fronte ás críticas dos grupos da oposición En Marea, PSdeG e BNG, que culparon ao Goberno galego de "non defender" os intereses do sector pesqueiro de Galicia e presentar unha realidade "edulcorada"; Mercedes Rodríguez cargou contra os grupos por "pintar unha realidade negra" para o "pim pam pum" contra a Xunta. Así as cousas, a responsable de Pesca expuxo que a frota de arrastre que faena no Cantábrico comercializou un 23 por cento máis en 2017 que en 2010 e facturou un 14% durante o mesmo período. Pola súa banda, o cerco tamén arroxou unha "evolución positiva" con incrementos do "90% nas descargas e un 34% na facturación".

Ademais, após resaltar que os datos medios do cerco reflicten unha facturación de máis de 278.000 euros e máis de 507 de toneladas descargadas, sinalou que nos últimos anos "incrementouse o número de barcos do cerco, de forma que neste momento hai 150 embarcacións fronte ás 147 de 2015". Así mesmo, a frota que traballa con volante e palangre no Cantábrico aumentaron as súas descargas nun 22 e un 33, respectivamente. Por último, Mercedes Rodríguez repasou os datos da frota de artes menores, que en 2017 descargou 18.680 toneladas, un 15 por cento máis que fai sete anos.

EMPREGO E DEMOGRAFÍA

Por outra banda, na Comisión 8ª de Pesca e Marisqueo, a deputada do PSdeG Loli Toja cuestionou á directora xeral sobre a perda de persoas ocupadas, especialmente mulleres --"unha de cada tres"--, no sector pesqueiro entre o primeiro trimestre de 2017 e o mesmo período do presente ano; caída cifrada en 4.400 persoas. Así, a socialista apuntou que a Xunta "recortou" as axudas e subvencións ao fomento do emprego, nalgúns casos "á metade", o que lle levou a censurar que o Goberno galego "non cumpre" co seu parte á hora de favorecer a "fixación da poboación" e a "substitución xeracional" no sector. Mercedes Rodríguez recoñeceu que existe "certo desequilibrio" pero afirmou que as afiliacións ao réxime especial de mar da Seguridade Social "mantéñense estables" desde o ano 2015 e o pasado mes de marzo "superáronse os 21.000 afiliados".