As axudas complementarias do bono social abrirán en xullo para pagar a factura da luz

Galicia será a primeira comunidade en ofrecer as axudas complementarias ao bono social estatal, que evitarán cortes eléctricos aos colectivos máis vulnerables. A orde da Xunta, que fusionará dúas liñas anteriores, está previsto que se publique este mes de xullo no Diario Oficial de Galicia (DOG) e permitirá, con crédito ampliable, solicitalas até o 15 decembro.

Na rolda de prensa posterior ao Consello, celebrado este venres, o presidente da Xunta, Alberto Núñez Feijóo, informou sobre a concesión destas axudas que, no caso dos colectivos máis vulnerables, cubrirán até 100 por cen da factura (o 40 por cento o Estado, o 50 por cento a Xunta e o 10 por cento restante as compañías). Estas axudas fusionarán varias liñas existentes --o tícket eléctrico e as axudas urxentes para evitar cortes de luz--, de maneira que, como explicou Feijóo, a Comunidade galega situarase á cabeza nas axudas para adaptalas ao novo marco estatal.

Concretamente, o bono social do Estado supón un desconto sobre o prezo voluntario para o consumidor (PVPC) do 25 por cento para o colectivo vulnerable e o 40 por cento para os vulnerables severos. A iso, a Xunta achegará outro 50 por cento para o colectivo vulnerable severo e en risco de exclusión social, para o que contará cun orzamento de 1,2 millóns de euros, ampliable. Feijóo detallou que os apoios na factura eléctrica á vivenda do solicitante terán unha contía máxima de entre 250 e 400 euros, no caso de familias numerosas, o que sumado ao acordo do Estado coas comercializadoras permitirá ás familias máis vulnerables ter acceso continuado á rede eléctrica.

BENEFICIARIOS

Polo momento, a Xunta non ten unha estimación de cantas familias se poderían beneficiar da medida, aínda que indicou que actualmente hai 7.000 axudas neste campo. Pero sobre todo, Feijóo destacou a relevancia dos cambios para os colectivos máis vulnerables, polo alcance que terá a medida. A orde, que segundo indicou o presidente da Xunta, está previsto que se publique no Diario Oficial de Galicia (DOG) este mes de xullo. Está validada polo Ministerio e pola Comisión Nacional dos Mercados e a Competencia.

As solicitudes, que se poderán pedir desde o día seguinte á súa publicación no DOG, poderán pedirse de forma presencial nas catro xefaturas territoriais, en Santiago e en Vigo, no rexistro do concello en que resida a persona --hai un acordo coa Fegamp-- ou de forma telemática. O prazo máximo de resolución será dun mes desde a presentación da solicitude. Unha vez que se comproben os requisitos, a Xunta abonará o importe directamente ás comercializadoras de electricidade, coas que, como indicou o presidente autonómico, iranse asinando protocolos de colaboración. Os pagos serán de forma mensual.