Por E.P. | SANTIAGO DE COMPOSTELA | 02/07/2018 | Actualizada ás 15:09
O BNG cre que a volta do PSOE a Moncloa reavivou as "loitas partidistas" entre socialistas e populares desde os seus respectivos gobernos en Madrid e Galicia. Para a líder frontista, Ana Pontón, a evidencia é que ambos os partidos empregan os prazos de chegada do AVE para o seu "xogo de tronos particular".
Este luns, a portavoz nacional do Bloque reclamou ao xefe do Goberno galego, Alberto Núñez Feijóo, que informe en sede parlamentaria dos temas incluídos na súa axenda para a súa reunión co presidente do Executivo estatal, Pedro Sánchez.
Para Pontón, a volta do Partido Socialista a Moncloa após anos de gobernos populares tanto en Galicia como na Administración central volveu a converter os "intereses" de Galicia "nunha arma arreboladiza" e un "elemento de desgaste" entre o PP e o PSOE.
Nesta liña, considera que socialistas e populares empregan a chegada do AVE a Galicia "nun novo pim pam pum partidista" a través de posicións "que varían segundo quen estea sentado na Moncloa, pero sen unha preocupación real polos intereses deste país".
"Nin o PSOE do señor (Gonzalo) Caballero pode ir a Madrid a facilitar o camiño para que o Goberno do Estado anuncie que o AVE vai sufrir un novo atraso; nin o PP do señor Feijóo pode encherse a boca dicindo que non permitirá nin un só atraso máis para a chegada da alta velocidade cando leva 10 anos sendo cómplice dos atrasos", aseverou.
Nesta liña, censurou que o presidente galego permanecese "calado mentres o Goberno central deixaba de investir 1.200 millóns de euros" en investimentos para Galicia recollidos nos PGE entre os anos 2015 e 2017, dos que, "case 1.000 millóns" eran para a execución das obras da AVE.
REUNIÓN SÁNCHEZ-FEIJÓO
Así as cousas, considera que a conclusión da conexión da liña de Alta Velocidade a Galicia debe ser un dos asuntos que figuren na "axenda" de Feijóo na súa reunión co xefe do Executivo central, prevista para o próximo 17 de xullo.
A maiores, Ana Pontón pide que na devandita "axenda" tamén estea incluída a transferencia da AP-9, a creación dunha "tarifa eléctrica galega" ou a necesidade de reconfigurar o modelo de financiamento autonómico.
Isto último levou á líder nacionalista a preguntarse "onde está" a proposta da Xunta no debate da reforma do sistema de financiamento, xa que, como apuntou, a proposición do Goberno galego "se converteu nun Expediente X" que "ninguén viu".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.