Facenda resta importancia ao número de fogares con dificultades e presume de que é "o máis baixo da serie histórica"

A Consellería de Facenda subliñou que o número de fogares galegos que pasan dificultades para chegar a fin de mes é "o máis baixo de toda a serie histórica", após a publicación dos datos por parte do Instituto Galego de Estatística (IGE). O departamento da Xunta busca así restar importancia aos datos que sinalan que case a metade dos fogares en Galicia están en problemas.

A través dunha nota de prensa, o departamento destaca que o número de fogares que chegan con facilidade a fin de mes aumentou até o 54,6%, mentres que a cifra relativa a aqueles que pasan dificultade ou moita dificultade descendeu até o 45,4%.

"Este é o resultado máis baixo de fogares con algunha dificultade a fin de mes de toda a serie histórica, que se inicia no primeiro trimestre de 2010", segundo sinala.

De feito, engade que o número de fogares que chegan con facilidade a fin de mes creceu 7,4 puntos respecto ao anterior trimestre e case unha décima no último ano.

Ademais, chama a atención tamén sobre que no segundo trimestre de 2018 se experimentou un incremento da confianza dos consumidores.

Por último, apunta que a enquisa do IGE mostra tamén unha redución dos fogares que no segundo trimestre tomaron medidas para reducir gastos ou aumentar ingresos.