Sindicatos ven "retardación" no mercado laboral e advirten de "precariedade" e "pobreza"

Os sindicatos CIG, UGT e CC.OO. observan "retardación" no mercado laboral galego, á luz dos datos do paro que publica este martes o Ministerio de Traballo. Ademais, seguen advertindo de "precariedade" e "pobreza".

En concreto, a CIG, a través dunha nota de prensa, avisa de que "se manterá a precariedade porque de nada vale un cambio de Goberno se non hai cambio de políticas", en referencia ao novo Executivo, presidido por Pedro Sánchez.

Pola súa banda, a central nacionalista lamenta que o descenso do número de desempregados é "de carácter puramente estacional" e alerta da "deterioración" tamén no relativo ás prestacións, o que leva aparellado un "empobrecimiento" dos cidadáns.

Do seu lado, UGT urxe "corrixir a precariedade" que en Galicia, subliña, "plásmase con máis de 100.000 contratos no mes pero só 8.408 afiliados máis na Seguridade Social". Tamén fala esta organización de baixada "estacional" do desemprego, e critica a "continua precarización do sistema de protección", nun "progresivo desmantelamento do sistema". "Incrementa o risco de pobreza e exclusión social", conclúe.

CC.OO. interpreta da información feita pública esta xornada que "unha mellora estatística non saca aos galegos da pobreza laboral", con eses "máis de 12 contratos por cada alta na Seguridade Social". Así, pon o foco na "extrema fraxilidade" dos postos de traballo creados e xulga que "se está abonando o camiño para que á volta do verán" haxa un "rápido e forte incremento do desemprego".

Pola súa banda, a Xunta suliñaba este martes nun comunicado que, de seguir esta tendencia, Galicia reducirá en 20.000 persoas anuais a lista do paro.