Galicia contará cun observatorio contra a discriminación do colectivo LGTBI
O principal obxectivo, segundo a Xunta, será o de "promover a igualdade real e efectiva" deste colectivo, así como contribuír ao coñecemento da realidade da diversidade e identificar as "necesidades e barreiras que impiden o pleno desenvolvemento" dos seus dereitos.
- Galicia celebra o Día do Orgullo LGTBI con manifestacións, bandeiras e iluminacións co arco da vella
- Colectivos LGTBI concentraranse este martes ante o Parlamento para demandar unha lei galega de identidade de xénero
Por E.P. | SANTIAGO DE COMPOSTELA | 04/07/2018 | Actualizada ás 13:59
A secretaria xeral de Igualdade, Susana López Abella, explicou este mércores que a Xunta creará un observatorio galego contra a discriminación por orientación sexual e identidade de xénero, de modo que Galicia será a terceira autonomía en contar cun órgano colexiado, consultivo e de participación social do colectivo LGTBI.
Segundo informou o Goberno galego nun comunicado, así o anunciou a secretaria xeral nunha resposta parlamentaria, na que precisou que a Administración autonómica está a ultimar o texto do decreto para crear esta institución "a través dun diálogo constante" coas asociacións LGTBI.
O principal obxectivo do observatorio, segundo a Xunta, será o de "promover a igualdade real e efectiva" deste colectivo, así como contribuír ao coñecemento da realidade da diversidade e identificar as "necesidades e barreiras que impiden o pleno desenvolvemento" dos seus dereitos.
Ademais, López Abella lembrou que Galicia foi "a primeira Comunidade" en contar cunha lei que consolida a igualdade de trato e non discriminación por razón de orientación sexual e identidade de xénero --a Lei 2/2014, do 14 de abril, pola igualdade de trato e a non discriminación de lesbianas, gais, transexuais, bisexuais e intersexuais en Galicia--.
Entre outras medidas, a secretaria xeral destacou a creación da unidade de atención á transexualidade a persoas menores de idade dentro do Servizo Galego de Saúde (Sergas), así como as campañas de sensibilización escolar para evitar a discriminación por orientación sexual.
