Por E.P. | Santiago de Compostela | 06/07/2018 | Actualizada ás 17:15
A construción da estación intermodal compostelá comezaron xa na capital galega co obxectivo de contar con ela para a celebración do Xacobeo 2021. Será a primeira estación destas características en Galicia, aínda que o resto tamén están en marcha, e suporá un "cambio de hábitos na mobilidade" da cidade, en palabras do presidente da Xunta, Alberto Núñez Feijóo.
"Galicia foi moi xenerosa atrasando (os prazos da alta velocidade) e estámonos preparando para recibir o AVE coa estación intermodal que agora comeza", proclamou o mandatario autonómico, nun acto no que tamén interveu o alcalde compostelán, Martiño Noriega, quen agradeceu á Xunta o seu esforzo neste investimento.
Durante a súa intervención, após a que todos os asistentes fixeron un percorrido polas obras —que está en fase de roza e proximamente implicará o derrube da antiga fábrica de Koipe—, Feijóo fixo un repaso sobre a infraestrutura, para o que "primeiro houbo que conseguir financiamento".
En total, a Xunta achega 12 millóns de euros en total de investimento (a obra que fai a Administración autonómica, da estación de autobuses, ten un custo de licitación de 10,4 millóns), mentres que se cofinanciarán as obras da pasarela que unirá os barrios do Ensanche e Pontepedriña, e para o que achegará unha parte o Concello.
Así, Feijóo subliñou que as obras da intermodal son a proba de que Galicia "está preparada" para recibir o AVE e lembrou que os traballos da de Ourense comezarán tamén en próximas semanas. E con esta obra, empeza a "materializarse o novo modelo de transporte público en Galicia", que está "a vivir a maior renovación dos últimos 40 anos.
"NON É UN DÍA CALQUERA"
Coa futura "estación total", como se chama tamén, a capital galega aglutinará autobuses, ferrocarril e taxis e servirá de lanzadeira cara ao aeroporto de Lavacolla. "Non é un día calquera para Galicia porque esta é a primeira estación intermodal que estamos a iniciar", sinalou.
Feijóo tamén destacou que este proxecto é posible grazas a que adaptou a lei que facilita a tramitación urbanística dos proxectos de interese público, o que á súa vez permitiu adaptar o plan de ordenación municipal en sete meses. "Estamos nun momento importantísimo para o transporte" e para "mellorar" a competitividade turística.
"ATRACTIVO" E "RESPECTUOSO"
O presidente da Xunta destacou, ademais, que o proxecto é "atractivo" e "respectuoso en volumes e deseño arquitectónico" e, ademais, contará con máis dársenas de autobuses das que hai actualmente en San Caetano. Tamén haberá un balcón ao río Sar e unirá dous barrios historicamente separados polas vías do tren.
"Evidentemente, se o AVE non chegase a Santiago, a utilidade desta estación sería ben distinta", advertiu o presidente, antes de indicar que a chegada da alta velocidade será un antes e un despois para Galicia e de lembrar que o inicio da súa circulación en probas está previsto para finais do 2019.
"Nós imos manter a esixencia leal con este Goberno, do mesmo xeito que a mantivemos co anterior", insistiu Feijóo, nunha mensaxe que repetiu nas últimas semanas, após o cambio de Goberno central.
Pola súa banda, o alcalde de Santiago, Martiño Noriega, lembrou que a estación é unha "demanda histórica" da cidade e subliñou que a pasarela unirá dous barrios, á vez que facilitará a eliminación de barreiras de infraestruturas. Así, agradeceu a Adif e Xunta que "fagan posible" cumprir con "unha demanda" que "poderán gozar os veciños" composteláns.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.