As mocidades da UPG renovan a súa dirección
Tras a crise de comezos de ano, A UMG elixiu a Paulo Rios como Secretario Xeral no XVII Congreso.
Por Galicia Confidencial | Compostela | 07/07/2018 | Actualizada ás 22:35
A Unión da Mocidade Galega (UMG), as mocidades da UPG, vén de elixir como novo Secretario Xeral a Paulo Rios Santomé no seu XVII Congreso. Aos seus 25 anos, é integrante da Dirección Nacional da Galiza Nova como Responsábel Comarcal do Morrazo, integrante do Consello Local do BNG de Moaña, do Consello Comarcal do Morrazo e Concelleiro de Mocidade do Concello de Moaña polo BNG.
Con esta elección, a UMG pon fin a unha serie de tensións internas que provocaron unha reestructuración da formación e a saída de antigos dirixentes. Precisamente, o novo secretario xeral desta formación, Rios Santomé, asegurou que afronta a elección con “ilusión” mais tamén “cunha grande responsabilidade de traballar para contribuir ao proxecto de liberación social e nacional da Galiza".
O seu obxectivo como Secretario Nacional, dixo, é o de continuar o traballo iniciado pola anterior dirección, o afortalamento da UMG como organización da mocidade comunista patriótica e ampliar o traballo nas organización das que fan parte no ámbito xuvenil e estudantil. "O anterior periodo deixanos unha UMG máis forte e cohexionada, a cal seguiremos coidando e que dará os seus froitos sempre entregados ao ben común", indicou.
Ademais, deu os parabéns aos 30 anos de traxectoria de Galiza Nova lembrando a importante contribución da Unión da Mocidade Galega na mesma. "A UMG debe ter como unha das súas prioridades o traballo no seo de Galiza e do BNG e a socialización do proxecto entre o conxunto da mocidade galega", apuntou. De feito, neste ano 2018, Galiza Nova, enceta un proceso preasemblear que culminará na súa XV Asemblea Nacional.
Rios Santomé tamén fixo referencia á participación da UMG no movemento estudantil galego. “Apostamos sen ambaxes por Erguer. Estudantes da Galiza, coma unha ferramenta indispensábel para defender os intereses do estudantado galego... traballando dende o consenso, a lealdade e o ben común, co gallo de velar polos intereses das estudantes á vez que espallamos conciencia nacional", apuntou logo dos problemas internos que tamén xurdiron nesta formación estudantil pola diferente militancia política dos seus dirixentes.
