Desarticulan unha organización que traficaba con heroína e cocaína na zona de Vigo coa detención de catro persoas

Axentes do Corpo Nacional de Policía desarticularon unha organización dedicada ao tráfico de heroína e cocaína na zona de Vigo e a súa área, coa detención de tres mulleres e un home (entre eles a persoa que presuntamente lidera a banda e a súa persoa de confianza) e o comiso de "gran cantidade" de heroína, cocaína e haxix.

Segundo informou a Policía Nacional, a partires da información solicitada descubriuse a posible existencia dunha organización estruturada e organizada, conformada por un clan familiar, que se dedicaba principalmente ao tráfico de heroína en Vigo, e que podía estar a estender as súas redes cara outros lugares.

A raíz das pescudas, na que foi denominada como operación 'Castelo', os investigadores identificaron ao líder e á súa persoa de confianza e os inmobles que empregaban para ocultar a droga e preparala para a súa distribución. Así foi que descubriron, ademais, que a parte da heroína, a organización comezou a distribuír cocaína e marihuana.

Desta forma, coa autorización do Xulgado de Instrución número sete de Vigo, procedeuse a deter aos catro presuntos membros da organización e practicáronse rexistros en varias das súas propiedades. Con iso, interviñéronse 90 doses de heroína, 80 de cocaína e diversas cantidades de haxix. Pola súa banda, os detidos quedaron a disposición xudicial.

A Policía Nacional agradeceu a colaboración anónima dos cidadáns que achegaron información, e lembrou que de forma anónima pódese comunicar a existencia de puntos de venda de drogas a través do correo electrónico (antidroga@policia.es).