Por X.M. Fernández | O Barco de Valdeorras | 16/07/2018 | Actualizada ás 20:00
Desde o Consello Regulador valoran moi positivamente o aumento de adegas participantes na XXI Feira do Viño Valdeorras e tamén o éxito de participación en canto a visitantes se refire. Estiman así mesmo que se serviron por riba de 8.000 copas de viño, unha cantidade que supera en 1.000 unidades as degustacións rexistradas o ano pasado. No que respecta á recadación, esta foi un 25% superior á de 2017.
O presidente do Consello Regulador, José Luis García Pando, quere por en valor o papel das 20 adegas que tomaron parte activa na feira, grazas as cales –considera- “tense acadado este éxito de participación, que é aínda máis significativo se temos en conta o mal tempo que fixo onte domingo”.
Premios da XIX Cata Oficial de Valdeorras
Na tarde do domingo entregáronse, na praza barquense de Viloira, os premios aos mellores caldos da cata oficial desta edición da Feira do Viño. Participaron 18 adegas e os viños e adegas distinguidas polo xurado foron:
En viños brancos, o primeiro premio foi para “Viñaredo” da Adega Santa Marta, o segundo para “D’Berna” de Adega Guitián e Blanco, e o terceiro levouno “Pagos de Galir” de Adega Virxe de Galir.
En viños tintos, o primeiro foi para “Sampayolo Garnacha” de Adega Sampayolo, o segundo para “A Coronela” de Adega O Cepado, e o terceiro para “Joaquín Rebolledo” de Adega Joaquín Rebolledo.
As mencións especiais “viños doutras añadas” foron para “Lagar de Cigur Barrica 2013” de Adega Melillas e Fillos e “Fardelas 2015” de Adega Santa Marta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.