Galicia defende a simplificación da PAC para "gañar en eficiencia"
A conselleira de Medio Rural, Ángeles Vázquez, destacou como "obxectivo fundamental" que a política agraria común (PAC) experimente unha simplificación "real" e que iso repercuta "directamente" en beneficio dos solicitantes.
Por E.P. | SANTIAGO DE COMPOSTELA | 16/07/2018 | Actualizada ás 18:20
Vázquez asistiu este luns por primeira vez ao consello de ministros da Unión Europea acompañando ao ministro de Agricultura, Luís Plans, en representación do resto de comunidades. "Non podemos perder tanto tempo e diñeiro nunha finalidade unicamente burocrática", subliñou a conselleira, en declaracións aos medios de comunicación.
Respecto diso, engadiu que, nun contexto marcado polo axuste de orzamento, é "imprescindible aforrar en papelorio e tramitación e non nas axudas que chegan aos beneficiarios".
Neste sentido, sinalou que "loitará" por manter o financiamento actual da PAC, "vital" para o rural galego. En Galicia hai 15 millóns de parcelas en só 500.000 hectáreas e estas leiras correspóndense con 33.000 beneficiarios da política agraria, segundo destaca Medio Rural a través dunha nota de prensa. Por iso, avoga pola dixitalización e as novas tecnoloxías para desenvolver os controis sobre o terreo. Como outra ferramenta para simplificar cita os plans estratéxicos, que deberán ter en conta as "características específicas de cada autonomía".
