O BNG reta o PP a apoiar a súa lei de memoria histórica

O BNG reta o PP a apoiar a súa proposta de lei de memoria histórica, "moi avanzada e esixente" e que rexistrará no Parlamento ao comezo do próximo período de sesións, para demostrar se está "a favor" destas políticas "máis aló de operacións de branqueo" ou do "lavado de cara" da formación, a cuxos membros acusa de actuar como "homes de palla do Franquismo".

A portavoz nacional do Bloque, Ana Pontón, e o deputado nacionalista Luís Bará, presentaron este mércores a súa proposta de lei de memoria histórica de Galicia, "froito dun traballo colectivo" pero que agora os nacionalistas colgarán na súa páxina web para recibir máis achegas cidadás.

Xusto este 18 de xullo, 82 anos despois do "golpe fascista", Bará criticou que o Partido Popular "sempre foi remiso" a estas políticas públicas. De feito, achacou a esta organización "pronunciamientos moi ofensivos".

A Feijóo, a líder do BNG atribuíulle "momentos vergoñentos" e "o colmo do descaro" ao achegarse 60.000 euros para que a familia Franco abrise o Pazo de Meirás ás visitas públicas, mentres se destinaron "cero euros" á recuperación da memoria.

RECUPERAR BENS INCAUTADOS

Respecto diso, Pontón expuxo que a lei de memoria histórica preparada polos nacionalistas prevé "abrir vías para recuperar bens incautados" como Meirás, a Casa Cornide e as estatuas de Isaac e Abraham.

Pola súa banda, o deputado Luís Bará explicou que a intención da lei é ter un carácter "transversal" e que recolle elementos como unha comisión da verdade, unha oficina de atención a vítimas, un censo de vítimas, un programa institucional para localización e exhumación de cadáveres de fosas comúns.

Tamén prevé aspectos como a prohibición de símbolos e actos a favor do Franquismo, medidas de socialización e divulgación, un consello para a participación pública e un réxime sancionador.

Bará reivindicou o "valor social, democrático e político" da memoria histórica, na súa vertente para favorecer a cohesión social e en contra de posicionamentos "guerracivilistas" ou desde "a trincheira".

Na súa quenda, Ana Pontón resaltou que esta lei "vén moi traballada" e avogou por unha política de memoria "activa" que leve "xustiza e reparación".

Así, fixo referencia ao período do bipartito entre PSdeG e Bloque (2005-2009), para chamar a atención sobre que, ao seu xuízo, desde entón non houbo unha política de memoria "real", e urxiu que se impulse, tamén "para recoñecer erros" da Transición.

"EN GALICIA NON HOUBO GUERRA CIVIL"

Neste punto, advertiu de que "en Galicia non houbo Guerra Civil", xa que entre 1936 e 1939 o que houbo, incidiu, foi "un exterminio sistemático" por parte do "fascismo", que "asasinou a máis de 4.700 galegos", segundo os seus datos, "sete de cada 10 en paseos franquistas" e o resto "após xuízos sumarísimos".

En total, cifrou nuns 7.000 os "desaparecidos" durante todo o Franquismo, persoas polas que ve que existe unha "débeda moral", fronte á "política do esquecemento deliberado en Galicia".

Neste sentido, considerou que actualmente se afronta un "franquismo sen Franco" con "pervivencia de privilexios" como o ducado e a "anacrónica monarquía", así como unha cultura "centralista e autoritaria" que "persegue a discrepancia", en referencia aos denominados '19 de Meirás' e tamén polo nove activistas axuizados pola ocupación simbólica da Casa Cornide da Coruña.

Por todo iso, o BNG aposta por dar "pasos noutra dirección", cara ao "dereito á verdade" e para poder "xulgar os crimes". Tamén de cara a que se anulen sentenzas ditadas por tribunais franquistas e a que se tipifique o delito de apoloxía ou exaltación do franquismo.