A UVigo coordina un proxecto europeo para previr riscos como incendios ou sismos

A Universidade de Vigo (UVigo) coordina un proxecto europeo polo que, xunto a outros 14 socios, desenvolverá modelos predictivos de eventos de risco, que permitirán previr situacións de emerxencia e adaptar os protocolos e coordinación; e creará materiais autorreparables, que, chegado o caso, "soportarán o problema".

Para iso, mediante a utilización e combinación de novas tecnoloxías e a participación humana (a través de redes sociais, patróns de mobilidade, e os sistemas dos seus vehículos) farán monitorizacións con intención de detectar eventos (como vibracións inusuais, aumentos de temperatura, deformacións...), para adoptar unha resposta rápida.

Así as cousas, a estimación inicial é que con estas innovacións poderanse mellorar "polo menos nun 20 por cento" tanto a mobilidade como o custo de mantemento das infraestruturas. "Estou seguro de que terá moito éxito", destacou o reitor da UVigo, Manuel Reigosa, que na presentación do proxecto trasladou o seu agradecemento "a todos os que fixeron posible este logro".

'Safeway', que xorde dunha rede de investigación e enmárcase no Horizonte 2020, arrincará en setembro e prolongarase até febreiro de 2022, e contará cun orzamento total de máis de 4,5 millóns de euros. No consorcio participan socios de Noruega, Reino Unido, Países Baixos, Portugal, Italia, Suíza, Estados Unidos e España.

DATOS E NOVOS MATERIAIS

En concreto, o proxecto recorrerá, por unha banda, a información satelital da rede 'Sentinel' (que ven "atractivo porque é gratuíto") para recoller datos en primeira instancia das zonas obxecto de estudo; e, doutra banda, a sensores terrestres e sistemas de climatoloxía, para así desenvolver "modelos predictivos que permitan coñecer o alcance do problema e adoptar medidas antes de que ocorra".

En canto aos novos materiais intelixentes, os coordinadores explicaron que traballarán no desenvolvemento de materiais para construcións novas, como cemento polimérico, que "aguanta mellor" ante a calor (de forma que resistirá mellor ante os incendios e aumentos de temperatura).

Ademais, tamén desenvolverán materiais autorreparables, aqueles con memoria de forma (é dicir, que ante un evento cambian de forma para reparar unha estrutura ou unha fenda), co fin de aplicalos en estradas e vías férreas. No entanto, neste caso en lugar de usar materiais caros, prevén usar aceiros (máis accesibles e baratos) con memoria de forma.

PILOTOS EN VARIOS PAÍSES

Aínda que os traballos de campo e en contacto coas infraestruturas iniciaranse xa nos primeiros seis meses do proxecto, será na última fase (entre os anos 2021 e 2022) cando se farán os estudos de casos reais (pilotos) na rede europea de transportes, concretamente en Portugal, España, Reino Unido e Países Baixos.

Estes casos de estudo cubrirán "os maiores potenciais riscos naturais": inundacións, secas, lumes forestais, terremotos e corrementos de terra; pero tamén os provocados polo home: lumes, accidentes e impacto de accións terroristas. Así, en España estudaranse os riscos sísmicos, inundacións e o efecto das temperaturas extremas en infraestruturas ferroviarias do Corredor Mediterráneo; e en Portugal o estudo farase en estradas e vías ferroviarias do Corredor Atlántico e centrarase nos incendios forestais e inundacións.

En Reino Unido o estudo orientarase aos riscos de inundacións e fallos nos noiros na infraestrutura ferroviaria do Corredor do Mar do Norte-Mediterráneo; e finalmente en Países Baixos se monitorizarán as infraestruturas mediante vehículos conectados e farase un piloto no Porto de Rotterdam con carácter intermodal (estradas, tren, transporte marítimo e navegación).